Mandalas 8 - (1716 verses)
Mandala 8 · Verse 1
tā vāṁ viśvasya gopā devā deveṣu yajñiyā | ṛtāvānā yajase pūtadakṣasā
Mandala 8 · Verse 2
mitrā tanā na rathyā3 varuṇo yaś ca sukratuḥ | sanāt sujātā tanayā dhṛtavratā
Mandala 8 · Verse 3
tā mātā viśvavedasāsuryāya pramahasā | mahī jajānāditir ṛtāvarī
Mandala 8 · Verse 4
mahāntā mitrāvaruṇā samrājā devāv asurā | ṛtāvānāv ṛtam ā ghoṣato bṛhat
Mandala 8 · Verse 5
napātā śavaso mahaḥ sūnū dakṣasya sukratū | sṛpradānū iṣo vāstv adhi kṣitaḥ
Mandala 8 · Verse 6
saṁ yā dānūni yemathur divyāḥ pārthivīr iṣaḥ | nabhasvatīr ā vāṁ carantu vṛṣṭayaḥ
Mandala 8 · Verse 7
adhi yā bṛhato divo3 'bhi yūtheva paśyataḥ | ṛtāvānā samrājā namase hitā
Mandala 8 · Verse 8
ṛtāvānā ni ṣedatuḥ sāmrājyāya sukratū | dhṛtavratā kṣatriyā kṣatram āśatuḥ
Mandala 8 · Verse 9
akṣṇaś cid gātuvittarānulbaṇena cakṣasā | ni cin miṣantā nicirā ni cikyatuḥ
Mandala 8 · Verse 10
uta no devy aditir uruṣyatāṁ nāsatyā | uruṣyantu maruto vṛddhaśavasaḥ
Mandala 8 · Verse 11
te no nāvam uruṣyata divā naktaṁ sudānavaḥ | ariṣyanto ni pāyubhiḥ sacemahi
Mandala 8 · Verse 12
aghnate viṣṇave vayam ariṣyantaḥ sudānave | śrudhi svayāvan sindho pūrvacittaye
Mandala 8 · Verse 13
tad vāryaṁ vṛṇīmahe variṣṭhaṁ gopayatyam | mitro yat pānti varuṇo yad aryamā
Mandala 8 · Verse 14
uta naḥ sindhur apāṁ tan marutas tad aśvinā | indro viṣṇur mīḍhvāṁsaḥ sajoṣasaḥ
Mandala 8 · Verse 15
te hi ṣmā vanuṣo naro 'bhimātiṁ kayasya cit | tigmaṁ na kṣodaḥ pratighnanti bhūrṇayaḥ
Mandala 8 · Verse 16
ayam eka itthā purūru caṣṭe vi viśpatiḥ | tasya vratāny anu vaś carāmasi
Mandala 8 · Verse 17
anu pūrvāṇy okyā sāmrājyasya saścima | mitrasya vratā varuṇasya dīrghaśrut
Mandala 8 · Verse 18
pari yo raśminā divo 'ntān mame pṛthivyāḥ | ubhe ā paprau rodasī mahitvā
Mandala 8 · Verse 19
ud u ṣya śaraṇe divo jyotir ayaṁsta sūryaḥ | agnir na śukraḥ samidhāna āhutaḥ
Mandala 8 · Verse 20
vaco dīrghaprasadmanīśe vājasya gomataḥ | īśe hi pitvo 'viṣasya dāvane
Mandala 8 · Verse 21
tat sūryaṁ rodasī ubhe doṣā vastor upa bruve | bhojeṣv asmām̐ abhy uc carā sadā
Mandala 8 · Verse 22
ṛjram ukṣaṇyāyane rajataṁ harayāṇe | rathaṁ yuktam asanāma suṣāmaṇi
Mandala 8 · Verse 23
tā me aśvyānāṁ harīṇāṁ nitośanā | uto nu kṛtvyānāṁ nṛvāhasā
Mandala 8 · Verse 24
smadabhīśū kaśāvantā viprā naviṣṭhayā matī | maho vājināv arvantā sacāsanam
Mandala 8 · Verse 1
yuvor u ṣū rathaṁ huve sadhastutyāya sūriṣu | atūrtadakṣā vṛṣaṇā vṛṣaṇvasū
Mandala 8 · Verse 2
yuvaṁ varo suṣāmṇe mahe tane nāsatyā | avobhir yātho vṛṣaṇā vṛṣaṇvasū
Mandala 8 · Verse 3
tā vām adya havāmahe havyebhir vājinīvasū | pūrvīr iṣa iṣayantāv ati kṣapaḥ
Mandala 8 · Verse 4
ā vāṁ vāhiṣṭho aśvinā ratho yātu śruto narā | upa stomān turasya darśathaḥ śriye
Mandala 8 · Verse 5
juhurāṇā cid aśvinā manyethāṁ vṛṣaṇvasū | yuvaṁ hi rudrā parṣatho ati dviṣaḥ
Mandala 8 · Verse 6
dasrā hi viśvam ānuṣaṅ makṣūbhiḥ paridīyathaḥ | dhiyaṁjinvā madhuvarṇā śubhas patī
Mandala 8 · Verse 7
upa no yātam aśvinā rāyā viśvapuṣā saha | maghavānā suvīrāv anapacyutā
Mandala 8 · Verse 8
ā me asya pratīvya1m indranāsatyā gatam | devā devebhir adya sacanastamā
Mandala 8 · Verse 9
vayaṁ hi vāṁ havāmaha ukṣaṇyanto vyaśvavat | sumatibhir upa viprāv ihā gatam
Mandala 8 · Verse 10
aśvinā sv ṛṣe stuhi kuvit te śravato havam | nedīyasaḥ kūḻayātaḥ paṇīm̐r uta
Mandala 8 · Verse 11
vaiyaśvasya śrutaṁ naroto me asya vedathaḥ | sajoṣasā varuṇo mitro aryamā
Mandala 8 · Verse 12
yuvādattasya dhiṣṇyā yuvānītasya sūribhiḥ | ahar-ahar vṛṣaṇa mahyaṁ śikṣatam
Mandala 8 · Verse 13
yo vāṁ yajñebhir āvṛto 'dhivastrā vadhūr iva | saparyantā śubhe cakrāte aśvinā
Mandala 8 · Verse 14
yo vām uruvyacastamaṁ ciketati nṛpāyyam | vartir aśvinā pari yātam asmayū
Mandala 8 · Verse 15
asmabhyaṁ su vṛṣaṇvasū yātaṁ vartir nṛpāyyam | viṣudruheva yajñam ūhathur girā
Mandala 8 · Verse 16
vāhiṣṭho vāṁ havānāṁ stomo dūto huvan narā | yuvābhyām bhūtv aśvinā
Mandala 8 · Verse 17
yad ado divo arṇava iṣo vā madatho gṛhe | śrutam in me amartyā
Mandala 8 · Verse 18
uta syā śvetayāvarī vāhiṣṭhā vāṁ nadīnām | sindhur hiraṇyavartaniḥ
Mandala 8 · Verse 19
smad etayā sukīrtyāśvinā śvetayā dhiyā | vahethe śubhrayāvānā
Mandala 8 · Verse 20
yukṣvā hi tvaṁ rathāsahā yuvasva poṣyā vaso | ān no vāyo madhu pibāsmākaṁ savanā gahi
Mandala 8 · Verse 21
tava vāyav ṛtaspate tvaṣṭur jāmātar adbhuta | avāṁsy ā vṛṇīmahe
Mandala 8 · Verse 22
tvaṣṭur jāmātaraṁ vayam īśānaṁ rāya īmahe | sutāvanto vāyuṁ dyumnā janāsaḥ
Mandala 8 · Verse 23
vāyo yāhi śivā divo vahasvā su svaśvyam | vahasva mahaḥ pṛthupakṣasā rathe
Mandala 8 · Verse 24
tvāṁ hi supsarastamaṁ nṛṣadaneṣu hūmahe | grāvāṇaṁ nāśvapṛṣṭham maṁhanā
Mandala 8 · Verse 25
sa tvaṁ no deva manasā vāyo mandāno agriyaḥ | kṛdhi vājām̐ apo dhiyaḥ
Mandala 8 · Verse 1
agnir ukthe purohito grāvāṇo barhir adhvare | ṛcā yāmi maruto brahmaṇas patiṁ devām̐ avo vareṇyam
Mandala 8 · Verse 2
ā paśuṁ gāsi pṛthivīṁ vanaspatīn uṣāsā naktam oṣadhīḥ | viśve ca no vasavo viśvavedaso dhīnām bhūta prāvitāraḥ
Mandala 8 · Verse 3
pra sū na etv adhvaro3 'gnā deveṣu pūrvyaḥ | ādityeṣu pra varuṇe dhṛtavrate marutsu viśvabhānuṣu
Mandala 8 · Verse 4
viśve hi ṣmā manave viśvavedaso bhuvan vṛdhe riśādasaḥ | ariṣṭebhiḥ pāyubhir viśvavedaso yantā no 'vṛkaṁ chardiḥ
Mandala 8 · Verse 5
ā no adya samanaso gantā viśve sajoṣasaḥ | ṛcā girā maruto devy adite sadane pastye mahi
Mandala 8 · Verse 6
abhi priyā maruto yā vo aśvyā havyā mitra prayāthana | ā barhir indro varuṇas turā nara ādityāsaḥ sadantu naḥ
Mandala 8 · Verse 7
vayaṁ vo vṛktabarhiṣo hitaprayasa ānuṣak | sutasomāso varuṇa havāmahe manuṣvad iddhāgnayaḥ
Mandala 8 · Verse 8
ā pra yāta maruto viṣṇo aśvinā pūṣan mākīnayā dhiyā | indra ā yātu prathamaḥ saniṣyubhir vṛṣā yo vṛtrahā gṛṇe
Mandala 8 · Verse 9
vi no devāso adruho 'cchidraṁ śarma yacchata | na yad dūrād vasavo nū cid antito varūtham ādadharṣati
Mandala 8 · Verse 10
asti hi vaḥ sajātyaṁ riśādaso devāso asty āpyam | pra ṇaḥ pūrvasmai suvitāya vocata makṣū sumnāya navyase
Mandala 8 · Verse 11
idā hi va upastutim idā vāmasya bhaktaye | upa vo viśvavedaso namasyur ām̐ asṛkṣy anyām iva
Mandala 8 · Verse 12
ud u ṣya vaḥ savitā supraṇītayo 'sthād ūrdhvo vareṇyaḥ | ni dvipādaś catuṣpādo arthino 'viśran patayiṣṇavaḥ
Mandala 8 · Verse 13
devaṁ-devaṁ vo 'vase devaṁ-devam abhiṣṭaye | devaṁ-devaṁ huvema vājasātaye gṛṇanto devyā dhiyā
Mandala 8 · Verse 14
devāso hi ṣmā manave samanyavo viśve sākaṁ sarātayaḥ | te no adya te aparaṁ tuce tu no bhavantu varivovidaḥ
Mandala 8 · Verse 15
pra vaḥ śaṁsāmy adruhaḥ saṁstha upastutīnām | na taṁ dhūrtir varuṇa mitra martyaṁ yo vo dhāmabhyo 'vidhat
Mandala 8 · Verse 16
pra sa kṣayaṁ tirate vi mahīr iṣo yo vo varāya dāśati | pra prajābhir jāyate dharmaṇas pary ariṣṭaḥ sarva edhate
Mandala 8 · Verse 17
ṛte sa vindate yudhaḥ sugebhir yāty adhvanaḥ | aryamā mitro varuṇaḥ sarātayo yaṁ trāyante sajoṣasaḥ
Mandala 8 · Verse 18
ajre cid asmai kṛṇuthā nyañcanaṁ durge cid ā susaraṇam | eṣā cid asmād aśaniḥ paro nu sāsredhantī vi naśyatu
Mandala 8 · Verse 19
yad adya sūrya udyati priyakṣatrā ṛtaṁ dadha | yan nimruci prabudhi viśvavedaso yad vā madhyaṁdine divaḥ
Mandala 8 · Verse 20
yad vābhipitve asurā ṛtaṁ yate chardir yema vi dāśuṣe | vayaṁ tad vo vasavo viśvavedasa upa stheyāma madhya ā
Mandala 8 · Verse 21
yad adya sūra udite yan madhyaṁdina ātuci | vāmaṁ dhattha manave viśvavedaso juhvānāya pracetase
Mandala 8 · Verse 22
vayaṁ tad vaḥ samrāja ā vṛṇīmahe putro na bahupāyyam | aśyāma tad ādityā juhvato havir yena vasyo 'naśāmahai
Mandala 8 · Verse 1
ye triṁśati trayas paro devāso barhir āsadan | vidann aha dvitāsanan
Mandala 8 · Verse 2
varuṇo mitro aryamā smadrātiṣāco agnayaḥ | patnīvanto vaṣaṭkṛtāḥ
Mandala 8 · Verse 3
te no gopā apācyās ta udak ta itthā nyak | purastāt sarvayā viśā
Mandala 8 · Verse 4
yathā vaśanti devās tathed asat tad eṣāṁ nakir ā minat | arāvā cana martyaḥ
Mandala 8 · Verse 5
saptānāṁ sapta ṛṣṭayaḥ sapta dyumnāny eṣām | sapto adhi śriyo dhire
Mandala 8 · Verse 1
babhrur eko viṣuṇaḥ sūnaro yuvāñjy aṅkte hiraṇyayam
Mandala 8 · Verse 2
yonim eka ā sasāda dyotano 'ntar deveṣu medhiraḥ
Mandala 8 · Verse 3
vāśīm eko bibharti hasta āyasīm antar deveṣu nidhruviḥ
Mandala 8 · Verse 4
vajram eko bibharti hasta āhitaṁ tena vṛtrāṇi jighnate
Mandala 8 · Verse 5
tigmam eko bibharti hasta āyudhaṁ śucir ugro jalāṣabheṣajaḥ
Mandala 8 · Verse 6
patha ekaḥ pīpāya taskaro yathām̐ eṣa veda nidhīnām
Mandala 8 · Verse 7
trīṇy eka urugāyo vi cakrame yatra devāso madanti
Mandala 8 · Verse 8
vibhir dvā carata ekayā saha pra pravāseva vasataḥ
Mandala 8 · Verse 9
sado dvā cakrāte upamā divi samrājā sarpirāsutī
Mandala 8 · Verse 10
arcanta eke mahi sāma manvata tena sūryam arocayan
Mandala 8 · Verse 1
nahi vo asty arbhako devāso na kumārakaḥ | viśve satomahānta it
Mandala 8 · Verse 2
iti stutāso asathā riśādaso ye stha trayaś ca triṁśac ca | manor devā yajñiyāsaḥ
Mandala 8 · Verse 3
te nas trādhvaṁ te 'vata ta u no adhi vocata | mā naḥ pathaḥ pitryān mānavād adhi dūraṁ naiṣṭa parāvataḥ
Mandala 8 · Verse 4
ye devāsa iha sthana viśve vaiśvānarā uta | asmabhyaṁ śarma sapratho gave 'śvāya yacchata
Mandala 8 · Verse 1
yo yajāti yajāta it sunavac ca pacāti ca | brahmed indrasya cākanat
Mandala 8 · Verse 2
puroḻāśaṁ yo asmai somaṁ rarata āśiram | pād it taṁ śakro aṁhasaḥ
Mandala 8 · Verse 3
tasya dyumām̐ asad ratho devajūtaḥ sa śūśuvat | viśvā vanvann amitriyā
Mandala 8 · Verse 4
asya prajāvatī gṛhe 'saścantī dive-dive | iḻā dhenumatī duhe
Mandala 8 · Verse 5
yā dampatī samanasā sunuta ā ca dhāvataḥ | devāso nityayāśirā
Mandala 8 · Verse 6
prati prāśavyām̐ itaḥ samyañcā barhir āśāte | na tā vājeṣu vāyataḥ
Mandala 8 · Verse 7
na devānām api hnutaḥ sumatiṁ na jugukṣataḥ | śravo bṛhad vivāsataḥ
Mandala 8 · Verse 8
putriṇā tā kumāriṇā viśvam āyur vy aśnutaḥ | ubhā hiraṇyapeśasā
Mandala 8 · Verse 9
vītihotrā kṛtadvasū daśasyantāmṛtāya kam | sam ūdho romaśaṁ hato deveṣu kṛṇuto duvaḥ
Mandala 8 · Verse 10
ā śarma parvatānāṁ vṛṇīmahe nadīnām | ā viṣṇoḥ sacābhuvaḥ
Mandala 8 · Verse 11
aitu pūṣā rayir bhagaḥ svasti sarvadhātamaḥ | urur adhvā svastaye
Mandala 8 · Verse 12
aramatir anarvaṇo viśvo devasya manasā | ādityānām aneha it
Mandala 8 · Verse 13
yathā no mitro aryamā varuṇaḥ santi gopāḥ | sugā ṛtasya panthāḥ
Mandala 8 · Verse 14
agniṁ vaḥ pūrvyaṁ girā devam īḻe vasūnām | saparyantaḥ purupriyam mitraṁ na kṣetrasādhasam
Mandala 8 · Verse 15
makṣū devavato rathaḥ śūro vā pṛtsu kāsu cit | devānāṁ ya in mano yajamāna iyakṣaty abhīd ayajvano bhuvat
Mandala 8 · Verse 16
na yajamāna riṣyasi na sunvāna na devayo | devānāṁ ya in mano yajamāna iyakṣaty abhīd ayajvano bhuvat
Mandala 8 · Verse 17
nakiṣ ṭaṁ karmaṇā naśan na pra yoṣan na yoṣati | devānāṁ ya in mano yajamāna iyakṣaty abhīd ayajvano bhuvat
Mandala 8 · Verse 18
asad atra suvīryam uta tyad āśvaśvyam | devānāṁ ya in mano yajamāna iyakṣaty abhīd ayajvano bhuvat
Mandala 8 · Verse 1
pra kṛtāny ṛjīṣiṇaḥ kaṇvā indrasya gāthayā | made somasya vocata
Mandala 8 · Verse 2
yaḥ sṛbindam anarśanim pipruṁ dāsam ahīśuvam | vadhīd ugro riṇann apaḥ
Mandala 8 · Verse 3
ny arbudasya viṣṭapaṁ varṣmāṇam bṛhatas tira | kṛṣe tad indra pauṁsyam
Mandala 8 · Verse 4
prati śrutāya vo dhṛṣat tūrṇāśaṁ na girer adhi | huve suśipram ūtaye
Mandala 8 · Verse 5
sa gor aśvasya vi vrajam mandānaḥ somyebhyaḥ | puraṁ na śūra darṣasi
Mandala 8 · Verse 6
yadi me rāraṇaḥ suta ukthe vā dadhase canaḥ | ārād upa svadhā gahi
Mandala 8 · Verse 7
vayaṁ ghā te api ṣmasi stotāra indra girvaṇaḥ | tvaṁ no jinva somapāḥ
Mandala 8 · Verse 8
uta naḥ pitum ā bhara saṁrarāṇo avikṣitam | maghavan bhūri te vasu
Mandala 8 · Verse 9
uta no gomatas kṛdhi hiraṇyavato aśvinaḥ | iḻābhiḥ saṁ rabhemahi
Mandala 8 · Verse 10
bṛbadukthaṁ havāmahe sṛprakarasnam ūtaye | sādhu kṛṇvantam avase
Mandala 8 · Verse 11
yaḥ saṁsthe cic chatakratur ād īṁ kṛṇoti vṛtrahā | jaritṛbhyaḥ purūvasuḥ
Mandala 8 · Verse 12
sa naḥ śakraś cid ā śakad dānavām̐ antarābharaḥ | indro viśvābhir ūtibhiḥ
Mandala 8 · Verse 13
yo rāyo3 'vanir mahān supāraḥ sunvataḥ sakhā | tam indram abhi gāyata
Mandala 8 · Verse 14
āyantāram mahi sthiram pṛtanāsu śravojitam | bhūrer īśānam ojasā
Mandala 8 · Verse 15
nakir asya śacīnāṁ niyantā sūnṛtānām | nakir vaktā na dād iti
Mandala 8 · Verse 16
na nūnam brahmaṇām ṛṇam prāśūnām asti sunvatām | na somo apratā pape
Mandala 8 · Verse 17
panya id upa gāyata panya ukthāni śaṁsata | brahmā kṛṇota panya it
Mandala 8 · Verse 18
panya ā dardirac chatā sahasrā vājy avṛtaḥ | indro yo yajvano vṛdhaḥ
Mandala 8 · Verse 19
vi ṣū cara svadhā anu kṛṣṭīnām anv āhuvaḥ | indra piba sutānām
Mandala 8 · Verse 20
piba svadhainavānām uta yas tugrye sacā | utāyam indra yas tava
Mandala 8 · Verse 21
atīhi manyuṣāviṇaṁ suṣuvāṁsam upāraṇe | imaṁ rātaṁ sutam piba
Mandala 8 · Verse 22
ihi tisraḥ parāvata ihi pañca janām̐ ati | dhenā indrāvacākaśat
Mandala 8 · Verse 23
sūryo raśmiṁ yathā sṛjā tvā yacchantu me giraḥ | nimnam āpo na sadhryak
Mandala 8 · Verse 24
adhvaryav ā tu hi ṣiñca somaṁ vīrāya śipriṇe | bharā sutasya pītaye
Mandala 8 · Verse 25
ya udnaḥ phaligam bhinan nya1k sindhūm̐r avāsṛjat | yo goṣu pakvaṁ dhārayat
Mandala 8 · Verse 26
ahan vṛtram ṛcīṣama aurṇavābham ahīśuvam | himenāvidhyad arbudam
Mandala 8 · Verse 27
pra va ugrāya niṣṭure 'ṣāḻhāya prasakṣiṇe | devattam brahma gāyata
Mandala 8 · Verse 28
yo viśvāny abhi vratā somasya made andhasaḥ | indro deveṣu cetati
Mandala 8 · Verse 29
iha tyā sadhamādyā harī hiraṇyakeśyā | voḻhām abhi prayo hitam
Mandala 8 · Verse 30
arvāñcaṁ tvā puruṣṭuta priyamedhastutā harī | somapeyāya vakṣataḥ
Mandala 8 · Verse 1
vayaṁ gha tvā sutāvanta āpo na vṛktabarhiṣaḥ | pavitrasya prasravaṇeṣu vṛtrahan pari stotāra āsate
Mandala 8 · Verse 2
svaranti tvā sute naro vaso nireka ukthinaḥ | kadā sutaṁ tṛṣāṇa oka ā gama indra svabdīva vaṁsagaḥ
Mandala 8 · Verse 3
kaṇvebhir dhṛṣṇav ā dhṛṣad vājaṁ darṣi sahasriṇam | piśaṅgarūpam maghavan vicarṣaṇe makṣū gomantam īmahe
Mandala 8 · Verse 4
pāhi gāyāndhaso mada indrāya medhyātithe | yaḥ sammiślo haryor yaḥ sute sacā vajrī ratho hiraṇyayaḥ
Mandala 8 · Verse 5
yaḥ suṣavyaḥ sudakṣiṇa ino yaḥ sukratur gṛṇe | ya ākaraḥ sahasrā yaḥ śatāmagha indro yaḥ pūrbhid āritaḥ
Mandala 8 · Verse 6
yo dhṛṣito yo 'vṛto yo asti śmaśruṣu śritaḥ | vibhūtadyumnaś cyavanaḥ puruṣṭutaḥ kratvā gaur iva śākinaḥ
Mandala 8 · Verse 7
ka īṁ veda sute sacā pibantaṁ kad vayo dadhe | ayaṁ yaḥ puro vibhinatty ojasā mandānaḥ śipry andhasaḥ
Mandala 8 · Verse 8
dānā mṛgo na vāraṇaḥ purutrā carathaṁ dadhe | nakiṣ ṭvā ni yamad ā sute gamo mahām̐ś carasy ojasā
Mandala 8 · Verse 9
ya ugraḥ sann aniṣṭṛtaḥ sthiro raṇāya saṁskṛtaḥ | yadi stotur maghavā śṛṇavad dhavaṁ nendro yoṣaty ā gamat
Mandala 8 · Verse 10
satyam itthā vṛṣed asi vṛṣajūtir no 'vṛtaḥ | vṛṣā hy ugra śṛṇviṣe parāvati vṛṣo arvāvati śrutaḥ
Mandala 8 · Verse 11
vṛṣaṇas te abhīśavo vṛṣā kaśā hiraṇyayī | vṛṣā ratho maghavan vṛṣaṇā harī vṛṣā tvaṁ śatakrato
Mandala 8 · Verse 12
vṛṣā sotā sunotu te vṛṣann ṛjīpinn ā bhara | vṛṣā dadhanve vṛṣaṇaṁ nadīṣv ā tubhyaṁ sthātar harīṇām
Mandala 8 · Verse 13
endra yāhi pītaye madhu śaviṣṭha somyam | nāyam acchā maghavā śṛṇavad giro brahmokthā ca sukratuḥ
Mandala 8 · Verse 14
vahantu tvā ratheṣṭhām ā harayo rathayujaḥ | tiraś cid aryaṁ savanāni vṛtrahann anyeṣāṁ yā śatakrato
Mandala 8 · Verse 15
asmākam adyāntamaṁ stomaṁ dhiṣva mahāmaha | asmākaṁ te savanā santu śaṁtamā madāya dyukṣa somapāḥ
Mandala 8 · Verse 16
nahi ṣas tava no mama śāstre anyasya raṇyati | yo asmān vīra ānayat
Mandala 8 · Verse 17
indraś cid ghā tad abravīt striyā aśāsyam manaḥ | uto aha kratuṁ raghum
Mandala 8 · Verse 18
saptī cid ghā madacyutā mithunā vahato ratham | eved dhūr vṛṣṇa uttarā
Mandala 8 · Verse 19
adhaḥ paśyasva mopari saṁtarām pādakau hara | mā te kaśaplakau dṛśan strī hi brahmā babhūvitha
Mandala 8 · Verse 1
endra yāhi haribhir upa kaṇvasya suṣṭutim | divo amuṣya śāsato divaṁ yaya divāvaso
Mandala 8 · Verse 2
ā tvā grāvā vadann iha somī ghoṣeṇa yacchatu | divo amuṣya śāsato divaṁ yaya divāvaso
Mandala 8 · Verse 3
atrā vi nemir eṣām urāṁ na dhūnute vṛkaḥ | divo amuṣya śāsato divaṁ yaya divāvaso
Mandala 8 · Verse 4
ā tvā kaṇvā ihāvase havante vājasātaye | divo amuṣya śāsato divaṁ yaya divāvaso
Mandala 8 · Verse 5
dadhāmi te sutānāṁ vṛṣṇe na pūrvapāyyam | divo amuṣya śāsato divaṁ yaya divāvaso
Mandala 8 · Verse 6
smatpuraṁdhir na ā gahi viśvatodhīr na ūtaye | divo amuṣya śāsato divaṁ yaya divāvaso
Mandala 8 · Verse 7
ā no yāhi mahemate sahasrote śatāmagha | divo amuṣya śāsato divaṁ yaya divāvaso
Mandala 8 · Verse 8
ā tvā hotā manurhito devatrā vakṣad īḍyaḥ | divo amuṣya śāsato divaṁ yaya divāvaso
Mandala 8 · Verse 9
ā tvā madacyutā harī śyenam pakṣeva vakṣataḥ | divo amuṣya śāsato divaṁ yaya divāvaso
Mandala 8 · Verse 10
ā yāhy arya ā pari svāhā somasya pītaye | divo amuṣya śāsato divaṁ yaya divāvaso
Mandala 8 · Verse 11
ā no yāhy upaśruty uktheṣu raṇayā iha | divo amuṣya śāsato divaṁ yaya divāvaso
Mandala 8 · Verse 12
sarūpair ā su no gahi sambhṛtaiḥ sambhṛtāśvaḥ | divo amuṣya śāsato divaṁ yaya divāvaso
Mandala 8 · Verse 13
ā yāhi parvatebhyaḥ samudrasyādhi viṣṭapaḥ | divo amuṣya śāsato divaṁ yaya divāvaso
Mandala 8 · Verse 14
ā no gavyāny aśvyā sahasrā śūra dardṛhi | divo amuṣya śāsato divaṁ yaya divāvaso
Mandala 8 · Verse 15
ā naḥ sahasraśo bharāyutāni śatāni ca | divo amuṣya śāsato divaṁ yaya divāvaso
Mandala 8 · Verse 16
ā yad indraś ca dadvahe sahasraṁ vasurociṣaḥ | ojiṣṭham aśvyam paśum
Mandala 8 · Verse 17
ya ṛjrā vātaraṁhaso 'ruṣāso raghuṣyadaḥ | bhrājante sūryā iva
Mandala 8 · Verse 18
pārāvatasya rātiṣu dravaccakreṣv āśuṣu | tiṣṭhaṁ vanasya madhya ā
Mandala 8 · Verse 1
agninendreṇa varuṇena viṣṇunādityai rudrair vasubhiḥ sacābhuvā | sajoṣasā uṣasā sūryeṇa ca somam pibatam aśvinā
Mandala 8 · Verse 2
viśvābhir dhībhir bhuvanena vājinā divā pṛthivyādribhiḥ sacābhuvā | sajoṣasā uṣasā sūryeṇa ca somam pibatam aśvinā
Mandala 8 · Verse 3
viśvair devais tribhir ekādaśair ihādbhir marudbhir bhṛgubhiḥ sacābhuvā | sajoṣasā uṣasā sūryeṇa ca somam pibatam aśvinā
Mandala 8 · Verse 4
juṣethāṁ yajñam bodhataṁ havasya me viśveha devau savanāva gacchatam | sajoṣasā uṣasā sūryeṇa ceṣaṁ no voḻham aśvinā
Mandala 8 · Verse 5
stomaṁ juṣethāṁ yuvaśeva kanyanāṁ viśveha devau savanāva gacchatam | sajoṣasā uṣasā sūryeṇa ceṣaṁ no voḻham aśvinā
Mandala 8 · Verse 6
giro juṣethām adhvaraṁ juṣethāṁ viśveha devau savanāva gacchatam | sajoṣasā uṣasā sūryeṇa ceṣaṁ no voḻham aśvinā
Mandala 8 · Verse 7
hāridraveva patatho vaned upa somaṁ sutam mahiṣevāva gacchathaḥ | sajoṣasā uṣasā sūryeṇa ca trir vartir yātam aśvinā
Mandala 8 · Verse 8
haṁsāv iva patatho adhvagāv iva somaṁ sutam mahiṣevāva gacchathaḥ | sajoṣasā uṣasā sūryeṇa ca trir vartir yātam aśvinā
Mandala 8 · Verse 9
śyenāv iva patatho havyadātaye somaṁ sutam mahiṣevāva gacchathaḥ | sajoṣasā uṣasā sūryeṇa ca trir vartir yātam aśvinā
Mandala 8 · Verse 10
pibataṁ ca tṛpṇutaṁ cā ca gacchatam prajāṁ ca dhattaṁ draviṇaṁ ca dhattam | sajoṣasā uṣasā sūryeṇa corjaṁ no dhattam aśvinā
Mandala 8 · Verse 11
jayataṁ ca pra stutaṁ ca pra cāvatam prajāṁ ca dhattaṁ draviṇaṁ ca dhattam | sajoṣasā uṣasā sūryeṇa corjaṁ no dhattam aśvinā
Mandala 8 · Verse 12
hataṁ ca śatrūn yatataṁ ca mitriṇaḥ prajāṁ ca dhattaṁ draviṇaṁ ca dhattam | sajoṣasā uṣasā sūryeṇa corjaṁ no dhattam aśvinā
Mandala 8 · Verse 13
mitrāvaruṇavantā uta dharmavantā marutvantā jaritur gacchatho havam | sajoṣasā uṣasā sūryeṇa cādityair yātam aśvinā
Mandala 8 · Verse 14
aṅgirasvantā uta viṣṇuvantā marutvantā jaritur gacchatho havam | sajoṣasā uṣasā sūryeṇa cādityair yātam aśvinā
Mandala 8 · Verse 15
ṛbhumantā vṛṣaṇā vājavantā marutvantā jaritur gacchatho havam | sajoṣasā uṣasā sūryeṇa cādityair yātam aśvinā
Mandala 8 · Verse 16
brahma jinvatam uta jinvataṁ dhiyo hataṁ rakṣāṁsi sedhatam amīvāḥ | sajoṣasā uṣasā sūryeṇa ca somaṁ sunvato aśvinā
Mandala 8 · Verse 17
kṣatraṁ jinvatam uta jinvataṁ nṝn hataṁ rakṣāṁsi sedhatam amīvāḥ | sajoṣasā uṣasā sūryeṇa ca somaṁ sunvato aśvinā
Mandala 8 · Verse 18
dhenūr jinvatam uta jinvataṁ viśo hataṁ rakṣāṁsi sedhatam amīvāḥ | sajoṣasā uṣasā sūryeṇa ca somaṁ sunvato aśvinā
Mandala 8 · Verse 19
atrer iva śṛṇutam pūrvyastutiṁ śyāvāśvasya sunvato madacyutā | sajoṣasā uṣasā sūryeṇa cāśvinā tiroahnyam
Mandala 8 · Verse 20
sargām̐ iva sṛjataṁ suṣṭutīr upa śyāvāśvasya sunvato madacyutā | sajoṣasā uṣasā sūryeṇa cāśvinā tiroahnyam
Mandala 8 · Verse 21
raśmīm̐r iva yacchatam adhvarām̐ upa śyāvāśvasya sunvato madacyutā | sajoṣasā uṣasā sūryeṇa cāśvinā tiroahnyam
Mandala 8 · Verse 22
arvāg rathaṁ ni yacchatam pibataṁ somyam madhu | ā yātam aśvinā gatam avasyur vām ahaṁ huve dhattaṁ ratnāni dāśuṣe
Mandala 8 · Verse 23
namovāke prasthite adhvare narā vivakṣaṇasya pītaye | ā yātam aśvinā gatam avasyur vām ahaṁ huve dhattaṁ ratnāni dāśuṣe
Mandala 8 · Verse 24
svāhākṛtasya tṛmpataṁ sutasya devāv andhasaḥ | ā yātam aśvinā gatam avasyur vām ahaṁ huve dhattaṁ ratnāni dāśuṣe
Mandala 8 · Verse 1
avitāsi sunvato vṛktabarhiṣaḥ pibā somam madāya kaṁ śatakrato | yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate
Mandala 8 · Verse 2
prāva stotāram maghavann ava tvām pibā somam madāya kaṁ śatakrato | yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate
Mandala 8 · Verse 3
ūrjā devām̐ avasy ojasā tvām pibā somam madāya kaṁ śatakrato | yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate
Mandala 8 · Verse 4
janitā divo janitā pṛthivyāḥ pibā somam madāya kaṁ śatakrato | yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate
Mandala 8 · Verse 5
janitāśvānāṁ janitā gavām asi pibā somam madāya kaṁ śatakrato | yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate
Mandala 8 · Verse 6
atrīṇāṁ stomam adrivo mahas kṛdhi pibā somam madāya kaṁ śatakrato | yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate
Mandala 8 · Verse 7
śyāvāśvasya sunvatas tathā śṛṇu yathāśṛṇor atreḥ karmāṇi kṛṇvataḥ | pra trasadasyum āvitha tvam eka in nṛṣāhya indra brahmāṇi vardhayan
Mandala 8 · Verse 1
predam brahma vṛtratūryeṣv āvitha pra sunvataḥ śacīpata indra viśvābhir ūtibhiḥ | mādhyaṁdinasya savanasya vṛtrahann anedya pibā somasya vajrivaḥ
Mandala 8 · Verse 2
sehāna ugra pṛtanā abhi druhaḥ śacīpata indra viśvābhir ūtibhiḥ | mādhyaṁdinasya savanasya vṛtrahann anedya pibā somasya vajrivaḥ
Mandala 8 · Verse 3
ekarāḻ asya bhuvanasya rājasi śacīpata indra viśvābhir ūtibhiḥ | mādhyaṁdinasya savanasya vṛtrahann anedya pibā somasya vajrivaḥ
Mandala 8 · Verse 4
sasthāvānā yavayasi tvam eka ic chacīpata indra viśvābhir ūtibhiḥ | mādhyaṁdinasya savanasya vṛtrahann anedya pibā somasya vajrivaḥ
Mandala 8 · Verse 5
kṣemasya ca prayujaś ca tvam īśiṣe śacīpata indra viśvābhir ūtibhiḥ | mādhyaṁdinasya savanasya vṛtrahann anedya pibā somasya vajrivaḥ
Mandala 8 · Verse 6
kṣatrāya tvam avasi na tvam āvitha śacīpata indra viśvābhir ūtibhiḥ | mādhyaṁdinasya savanasya vṛtrahann anedya pibā somasya vajrivaḥ
Mandala 8 · Verse 7
śyāvāśvasya rebhatas tathā śṛṇu yathāśṛṇor atreḥ karmāṇi kṛṇvataḥ | pra trasadasyum āvitha tvam eka in nṛṣāhya indra kṣatrāṇi vardhayan
Mandala 8 · Verse 1
yajñasya hi stha ṛtvijā sasnī vājeṣu karmasu | indrāgnī tasya bodhatam
Mandala 8 · Verse 2
tośāsā rathayāvānā vṛtrahaṇāparājitā | indrāgnī tasya bodhatam
Mandala 8 · Verse 3
idaṁ vām madiram madhv adhukṣann adribhir naraḥ | indrāgnī tasya bodhatam
Mandala 8 · Verse 4
juṣethāṁ yajñam iṣṭaye sutaṁ somaṁ sadhastutī | indrāgnī ā gataṁ narā
Mandala 8 · Verse 5
imā juṣethāṁ savanā yebhir havyāny ūhathuḥ | indrāgnī ā gataṁ narā
Mandala 8 · Verse 6
imāṁ gāyatravartaniṁ juṣethāṁ suṣṭutim mama | indrāgnī ā gataṁ narā
Mandala 8 · Verse 7
prātaryāvabhir ā gataṁ devebhir jenyāvasū | indrāgnī somapītaye
Mandala 8 · Verse 8
śyāvāśvasya sunvato 'trīṇāṁ śṛṇutaṁ havam | indrāgnī somapītaye
Mandala 8 · Verse 9
evā vām ahva ūtaye yathāhuvanta medhirāḥ | indrāgnī somapītaye
Mandala 8 · Verse 10
āhaṁ sarasvatīvator indrāgnyor avo vṛṇe | yābhyāṁ gāyatram ṛcyate
Mandala 8 · Verse 1
agnim astoṣy ṛgmiyam agnim īḻā yajadhyai | agnir devām̐ anaktu na ubhe hi vidathe kavir antaś carati dūtya1ṁ nabhantām anyake same
Mandala 8 · Verse 2
ny agne navyasā vacas tanūṣu śaṁsam eṣām | ny arātī rarāvṇāṁ viśvā aryo arātīr ito yucchantv āmuro nabhantām anyake same
Mandala 8 · Verse 3
agne manmāni tubhyaṁ kaṁ ghṛtaṁ na juhva āsani | sa deveṣu pra cikiddhi tvaṁ hy asi pūrvyaḥ śivo dūto vivasvato nabhantām anyake same
Mandala 8 · Verse 4
tat-tad agnir vayo dadhe yathā-yathā kṛpaṇyati | ūrjāhutir vasūnāṁ śaṁ ca yoś ca mayo dadhe viśvasyai devahūtyai nabhantām anyake same
Mandala 8 · Verse 5
sa ciketa sahīyasāgniś citreṇa karmaṇā | sa hotā śaśvatīnāṁ dakṣiṇābhir abhīvṛta inoti ca pratīvya1ṁ nabhantām anyake same
Mandala 8 · Verse 6
agnir jātā devānām agnir veda martānām apīcyam | agniḥ sa draviṇodā agnir dvārā vy ūrṇute svāhuto navīyasā nabhantām anyake same
Mandala 8 · Verse 7
agnir deveṣu saṁvasuḥ sa vikṣu yajñiyāsv ā | sa mudā kāvyā puru viśvam bhūmeva puṣyati devo deveṣu yajñiyo nabhantām anyake same
Mandala 8 · Verse 8
yo agniḥ saptamānuṣaḥ śrito viśveṣu sindhuṣu | tam āganma tripastyam mandhātur dasyuhantamam agniṁ yajñeṣu pūrvyaṁ nabhantām anyake same
Mandala 8 · Verse 9
agnis trīṇi tridhātūny ā kṣeti vidathā kaviḥ | sa trīm̐r ekādaśām̐ iha yakṣac ca piprayac ca no vipro dūtaḥ pariṣkṛto nabhantām anyake same
Mandala 8 · Verse 10
tvaṁ no agna āyuṣu tvaṁ deveṣu pūrvya vasva eka irajyasi | tvām āpaḥ parisrutaḥ pari yanti svasetavo nabhantām anyake same
Mandala 8 · Verse 1
indrāgnī yuvaṁ su naḥ sahantā dāsatho rayim | yena dṛḻhā samatsv ā vīḻu cit sāhiṣīmahy agnir vaneva vāta in nabhantām anyake same
Mandala 8 · Verse 2
nahi vāṁ vavrayāmahe 'thendram id yajāmahe śaviṣṭhaṁ nṛṇāṁ naram | sa naḥ kadā cid arvatā gamad ā vājasātaye gamad ā medhasātaye nabhantām anyake same
Mandala 8 · Verse 3
tā hi madhyam bharāṇām indrāgnī adhikṣitaḥ | tā u kavitvanā kavī pṛcchyamānā sakhīyate saṁ dhītam aśnutaṁ narā nabhantām anyake same
Mandala 8 · Verse 4
abhy arca nabhākavad indrāgnī yajasā girā | yayor viśvam idaṁ jagad iyaṁ dyauḥ pṛthivī mahy u1pasthe bibhṛto vasu nabhantām anyake same
Mandala 8 · Verse 5
pra brahmāṇi nabhākavad indrāgnibhyām irajyata | yā saptabudhnam arṇavaṁ jihmabāram aporṇuta indra īśāna ojasā nabhantām anyake same
Mandala 8 · Verse 6
api vṛśca purāṇavad vratater iva guṣpitam ojo dāsasya dambhaya | vayaṁ tad asya sambhṛtaṁ vasv indreṇa vi bhajemahi nabhantām anyake same
Mandala 8 · Verse 7
yad indrāgnī janā ime vihvayante tanā girā | asmākebhir nṛbhir vayaṁ sāsahyāma pṛtanyato vanuyāma vanuṣyato nabhantām anyake same
Mandala 8 · Verse 8
yā nu śvetāv avo diva uccarāta upa dyubhiḥ | indrāgnyor anu vratam uhānā yanti sindhavo yān sīm bandhād amuñcatāṁ nabhantām anyake same
Mandala 8 · Verse 9
pūrvīṣ ṭa indropamātayaḥ pūrvīr uta praśastayaḥ sūno hinvasya harivaḥ | vasvo vīrasyāpṛco yā nu sādhanta no dhiyo nabhantām anyake same
Mandala 8 · Verse 10
taṁ śiśītā suvṛktibhis tveṣaṁ satvānam ṛgmiyam | uto nu cid ya ojasā śuṣṇasyāṇḍāni bhedati jeṣat svarvatīr apo nabhantām anyake same
Mandala 8 · Verse 11
taṁ śiśītā svadhvaraṁ satyaṁ satvānam ṛtviyam | uto nu cid ya ohata āṇḍā śuṣṇasya bhedaty ajaiḥ svarvatīr apo nabhantām anyake same
Mandala 8 · Verse 12
evendrāgnibhyām pitṛvan navīyo mandhātṛvad aṅgirasvad avāci | tridhātunā śarmaṇā pātam asmān vayaṁ syāma patayo rayīṇām
Mandala 8 · Verse 1
asmā ū ṣu prabhūtaye varuṇāya marudbhyo 'rcā viduṣṭarebhyaḥ | yo dhītā mānuṣāṇām paśvo gā iva rakṣati nabhantām anyake same
Mandala 8 · Verse 2
tam ū ṣu samanā girā pitṝṇāṁ ca manmabhiḥ | nābhākasya praśastibhir yaḥ sindhūnām upodaye saptasvasā sa madhyamo nabhantām anyake same
Mandala 8 · Verse 3
sa kṣapaḥ pari ṣasvaje ny u1sro māyayā dadhe sa viśvam pari darśataḥ | tasya venīr anu vratam uṣas tisro avardhayan nabhantām anyake same
Mandala 8 · Verse 4
yaḥ kakubho nidhārayaḥ pṛthivyām adhi darśataḥ | sa mātā pūrvyam padaṁ tad varuṇasya saptyaṁ sa hi gopā iveryo nabhantām anyake same
Mandala 8 · Verse 5
yo dhartā bhuvanānāṁ ya usrāṇām apīcyā3 veda nāmāni guhyā | sa kaviḥ kāvyā puru rūpaṁ dyaur iva puṣyati nabhantām anyake same
Mandala 8 · Verse 6
yasmin viśvāni kāvyā cakre nābhir iva śritā | tritaṁ jūtī saparyata vraje gāvo na saṁyuje yuje aśvām̐ ayukṣata nabhantām anyake same
Mandala 8 · Verse 7
ya āsv atka āśaye viśvā jātāny eṣām | pari dhāmāni marmṛśad varuṇasya puro gaye viśve devā anu vrataṁ nabhantām anyake same
Mandala 8 · Verse 8
sa samudro apīcyas turo dyām iva rohati ni yad āsu yajur dadhe | sa māyā arcinā padāstṛṇān nākam āruhan nabhantām anyake same
Mandala 8 · Verse 9
yasya śvetā vicakṣaṇā tisro bhūmīr adhikṣitaḥ | trir uttarāṇi papratur varuṇasya dhruvaṁ sadaḥ sa saptānām irajyati nabhantām anyake same
Mandala 8 · Verse 10
yaḥ śvetām̐ adhinirṇijaś cakre kṛṣṇām̐ anu vratā | sa dhāma pūrvyam mame yaḥ skambhena vi rodasī ajo na dyām adhārayan nabhantām anyake same
Mandala 8 · Verse 1
astabhnād dyām asuro viśvavedā amimīta varimāṇam pṛthivyāḥ | āsīdad viśvā bhuvanāni samrāḍ viśvet tāni varuṇasya vratāni
Mandala 8 · Verse 2
evā vandasva varuṇam bṛhantaṁ namasyā dhīram amṛtasya gopām | sa naḥ śarma trivarūthaṁ vi yaṁsat pātaṁ no dyāvāpṛthivī upasthe
Mandala 8 · Verse 3
imāṁ dhiyaṁ śikṣamāṇasya deva kratuṁ dakṣaṁ varuṇa saṁ śiśādhi | yayāti viśvā duritā tarema sutarmāṇam adhi nāvaṁ ruhema
Mandala 8 · Verse 4
ā vāṁ grāvāṇo aśvinā dhībhir viprā acucyavuḥ | nāsatyā somapītaye nabhantām anyake same
Mandala 8 · Verse 5
yathā vām atrir aśvinā gīrbhir vipro ajohavīt | nāsatyā somapītaye nabhantām anyake same
Mandala 8 · Verse 6
evā vām ahva ūtaye yathāhuvanta medhirāḥ | nāsatyā somapītaye nabhantām anyake same
Mandala 8 · Verse 1
ime viprasya vedhaso 'gner astṛtayajvanaḥ | giraḥ stomāsa īrate
Mandala 8 · Verse 2
asmai te pratiharyate jātavedo vicarṣaṇe | agne janāmi suṣṭutim
Mandala 8 · Verse 3
ārokā iva ghed aha tigmā agne tava tviṣaḥ | dadbhir vanāni bapsati
Mandala 8 · Verse 4
harayo dhūmaketavo vātajūtā upa dyavi | yatante vṛthag agnayaḥ
Mandala 8 · Verse 5
ete tye vṛthag agnaya iddhāsaḥ sam adṛkṣata | uṣasām iva ketavaḥ
Mandala 8 · Verse 6
kṛṣṇā rajāṁsi patsutaḥ prayāṇe jātavedasaḥ | agnir yad rodhati kṣami
Mandala 8 · Verse 7
dhāsiṁ kṛṇvāna oṣadhīr bapsad agnir na vāyati | punar yan taruṇīr api
Mandala 8 · Verse 8
jihvābhir aha nannamad arciṣā jañjaṇābhavan | agnir vaneṣu rocate
Mandala 8 · Verse 9
apsv agne sadhiṣ ṭava sauṣadhīr anu rudhyase | garbhe sañ jāyase punaḥ
Mandala 8 · Verse 10
ud agne tava tad ghṛtād arcī rocata āhutam | niṁsānaṁ juhvo3 mukhe
Mandala 8 · Verse 11
ukṣānnāya vaśānnāya somapṛṣṭhāya vedhase | stomair vidhemāgnaye
Mandala 8 · Verse 12
uta tvā namasā vayaṁ hotar vareṇyakrato | agne samidbhir īmahe
Mandala 8 · Verse 13
uta tvā bhṛguvac chuce manuṣvad agna āhuta | aṅgirasvad dhavāmahe
Mandala 8 · Verse 14
tvaṁ hy agne agninā vipro vipreṇa san satā | sakhā sakhyā samidhyase
Mandala 8 · Verse 15
sa tvaṁ viprāya dāśuṣe rayiṁ dehi sahasriṇam | agne vīravatīm iṣam
Mandala 8 · Verse 16
agne bhrātaḥ sahaskṛta rohidaśva śucivrata | imaṁ stomaṁ juṣasva me
Mandala 8 · Verse 17
uta tvāgne mama stuto vāśrāya pratiharyate | goṣṭhaṁ gāva ivāśata
Mandala 8 · Verse 18
tubhyaṁ tā aṅgirastama viśvāḥ sukṣitayaḥ pṛthak | agne kāmāya yemire
Mandala 8 · Verse 19
agniṁ dhībhir manīṣiṇo medhirāso vipaścitaḥ | admasadyāya hinvire
Mandala 8 · Verse 20
taṁ tvām ajmeṣu vājinaṁ tanvānā agne adhvaram | vahniṁ hotāram īḻate
Mandala 8 · Verse 21
purutrā hi sadṛṅṅ asi viśo viśvā anu prabhuḥ | samatsu tvā havāmahe
Mandala 8 · Verse 22
tam īḻiṣva ya āhuto 'gnir vibhrājate ghṛtaiḥ | imaṁ naḥ śṛṇavad dhavam
Mandala 8 · Verse 23
taṁ tvā vayaṁ havāmahe śṛṇvantaṁ jātavedasam | agne ghnantam apa dviṣaḥ
Mandala 8 · Verse 24
viśāṁ rājānam adbhutam adhyakṣaṁ dharmaṇām imam | agnim īḻe sa u śravat
Mandala 8 · Verse 25
agniṁ viśvāyuvepasam maryaṁ na vājinaṁ hitam | saptiṁ na vājayāmasi
Mandala 8 · Verse 26
ghnan mṛdhrāṇy apa dviṣo dahan rakṣāṁsi viśvahā | agne tigmena dīdihi
Mandala 8 · Verse 27
yaṁ tvā janāsa indhate manuṣvad aṅgirastama | agne sa bodhi me vacaḥ
Mandala 8 · Verse 28
yad agne divijā asy apsujā vā sahaskṛta | taṁ tvā gīrbhir havāmahe
Mandala 8 · Verse 29
tubhyaṁ ghet te janā ime viśvāḥ sukṣitayaḥ pṛthak | dhāsiṁ hinvanty attave
Mandala 8 · Verse 30
te ghed agne svādhyo 'hā viśvā nṛcakṣasaḥ | tarantaḥ syāma durgahā
Mandala 8 · Verse 31
agnim mandram purupriyaṁ śīram pāvakaśociṣam | hṛdbhir mandrebhir īmahe
Mandala 8 · Verse 32
sa tvam agne vibhāvasuḥ sṛjan sūryo na raśmibhiḥ | śardhan tamāṁsi jighnase
Mandala 8 · Verse 33
tat te sahasva īmahe dātraṁ yan nopadasyati | tvad agne vāryaṁ vasu
Mandala 8 · Verse 1
samidhāgniṁ duvasyata ghṛtair bodhayatātithim | āsmin havyā juhotana
Mandala 8 · Verse 2
agne stomaṁ juṣasva me vardhasvānena manmanā | prati sūktāni harya naḥ
Mandala 8 · Verse 3
agniṁ dūtam puro dadhe havyavāham upa bruve | devām̐ ā sādayād iha
Mandala 8 · Verse 4
ut te bṛhanto arcayaḥ samidhānasya dīdivaḥ | agne śukrāsa īrate
Mandala 8 · Verse 5
upa tvā juhvo3 mama ghṛtācīr yantu haryata | agne havyā juṣasva naḥ
Mandala 8 · Verse 6
mandraṁ hotāram ṛtvijaṁ citrabhānuṁ vibhāvasum | agnim īḻe sa u śravat
Mandala 8 · Verse 7
pratnaṁ hotāram īḍyaṁ juṣṭam agniṁ kavikratum | adhvarāṇām abhiśriyam
Mandala 8 · Verse 8
juṣāṇo aṅgirastamemā havyāny ānuṣak | agne yajñaṁ naya ṛtuthā
Mandala 8 · Verse 9
samidhāna u santya śukraśoca ihā vaha | cikitvān daivyaṁ janam
Mandala 8 · Verse 10
vipraṁ hotāram adruhaṁ dhūmaketuṁ vibhāvasum | yajñānāṁ ketum īmahe
Mandala 8 · Verse 11
agne ni pāhi nas tvam prati ṣma deva rīṣataḥ | bhindhi dveṣaḥ sahaskṛta
Mandala 8 · Verse 12
agniḥ pratnena manmanā śumbhānas tanva1ṁ svām | kavir vipreṇa vāvṛdhe
Mandala 8 · Verse 13
ūrjo napātam ā huve 'gnim pāvakaśociṣam | asmin yajñe svadhvare
Mandala 8 · Verse 14
sa no mitramahas tvam agne śukreṇa śociṣā | devair ā satsi barhiṣi
Mandala 8 · Verse 15
yo agniṁ tanvo3 dame devam martaḥ saparyati | tasmā id dīdayad vasu
Mandala 8 · Verse 16
agnir mūrdhā divaḥ kakut patiḥ pṛthivyā ayam | apāṁ retāṁsi jinvati
Mandala 8 · Verse 17
ud agne śucayas tava śukrā bhrājanta īrate | tava jyotīṁṣy arcayaḥ
Mandala 8 · Verse 18
īśiṣe vāryasya hi dātrasyāgne svarpatiḥ | stotā syāṁ tava śarmaṇi
Mandala 8 · Verse 19
tvām agne manīṣiṇas tvāṁ hinvanti cittibhiḥ | tvāṁ vardhantu no giraḥ
Mandala 8 · Verse 20
adabdhasya svadhāvato dūtasya rebhataḥ sadā | agneḥ sakhyaṁ vṛṇīmahe
Mandala 8 · Verse 21
agniḥ śucivratatamaḥ śucir vipraḥ śuciḥ kaviḥ | śucī rocata āhutaḥ
Mandala 8 · Verse 22
uta tvā dhītayo mama giro vardhantu viśvahā | agne sakhyasya bodhi naḥ
Mandala 8 · Verse 23
yad agne syām ahaṁ tvaṁ tvaṁ vā ghā syā aham | syuṣ ṭe satyā ihāśiṣaḥ
Mandala 8 · Verse 24
vasur vasupatir hi kam asy agne vibhāvasuḥ | syāma te sumatāv api
Mandala 8 · Verse 25
agne dhṛtavratāya te samudrāyeva sindhavaḥ | giro vāśrāsa īrate
Mandala 8 · Verse 26
yuvānaṁ viśpatiṁ kaviṁ viśvādam puruvepasam | agniṁ śumbhāmi manmabhiḥ
Mandala 8 · Verse 27
yajñānāṁ rathye vayaṁ tigmajambhāya vīḻave | stomair iṣemāgnaye
Mandala 8 · Verse 28
ayam agne tve api jaritā bhūtu santya | tasmai pāvaka mṛḻaya
Mandala 8 · Verse 29
dhīro hy asy admasad vipro na jāgṛviḥ sadā | agne dīdayasi dyavi
Mandala 8 · Verse 30
purāgne duritebhyaḥ purā mṛdhrebhyaḥ kave | pra ṇa āyur vaso tira
Mandala 8 · Verse 1
ā ghā ye agnim indhate stṛṇanti barhir ānuṣak | yeṣām indro yuvā sakhā
Mandala 8 · Verse 2
bṛhann id idhma eṣām bhūri śastam pṛthuḥ svaruḥ | yeṣām indro yuvā sakhā
Mandala 8 · Verse 3
ayuddha id yudhā vṛtaṁ śūra ājati satvabhiḥ | yeṣām indro yuvā sakhā
Mandala 8 · Verse 4
ā bundaṁ vṛtrahā dade jātaḥ pṛcchad vi mātaram | ka ugrāḥ ke ha śṛṇvire
Mandala 8 · Verse 5
prati tvā śavasī vadad girāv apso na yodhiṣat | yas te śatrutvam ācake
Mandala 8 · Verse 6
uta tvam maghavañ chṛṇu yas te vaṣṭi vavakṣi tat | yad vīḻayāsi vīḻu tat
Mandala 8 · Verse 7
yad ājiṁ yāty ājikṛd indraḥ svaśvayur upa | rathītamo rathīnām
Mandala 8 · Verse 8
vi ṣu viśvā abhiyujo vajrin viṣvag yathā vṛha | bhavā naḥ suśravastamaḥ
Mandala 8 · Verse 9
asmākaṁ su ratham pura indraḥ kṛṇotu sātaye | na yaṁ dhūrvanti dhūrtayaḥ
Mandala 8 · Verse 10
vṛjyāma te pari dviṣo 'raṁ te śakra dāvane | gamemed indra gomataḥ
Mandala 8 · Verse 11
śanaiś cid yanto adrivo 'śvāvantaḥ śatagvinaḥ | vivakṣaṇā anehasaḥ
Mandala 8 · Verse 12
ūrdhvā hi te dive-dive sahasrā sūnṛtā śatā | jaritṛbhyo vimaṁhate
Mandala 8 · Verse 13
vidmā hi tvā dhanaṁjayam indra dṛḻhā cid ārujam | ādāriṇaṁ yathā gayam
Mandala 8 · Verse 14
kakuhaṁ cit tvā kave mandantu dhṛṣṇav indavaḥ | ā tvā paṇiṁ yad īmahe
Mandala 8 · Verse 15
yas te revām̐ adāśuriḥ pramamarṣa maghattaye | tasya no veda ā bhara
Mandala 8 · Verse 16
ima u tvā vi cakṣate sakhāya indra sominaḥ | puṣṭāvanto yathā paśum
Mandala 8 · Verse 17
uta tvābadhiraṁ vayaṁ śrutkarṇaṁ santam ūtaye | dūrād iha havāmahe
Mandala 8 · Verse 18
yac chuśrūyā imaṁ havaṁ durmarṣaṁ cakriyā uta | bhaver āpir no antamaḥ
Mandala 8 · Verse 19
yac cid dhi te api vyathir jaganvāṁso amanmahi | godā id indra bodhi naḥ
Mandala 8 · Verse 20
ā tvā rambhaṁ na jivrayo rarabhmā śavasas pate | uśmasi tvā sadhastha ā
Mandala 8 · Verse 21
stotram indrāya gāyata purunṛmṇāya satvane | nakir yaṁ vṛṇvate yudhi
Mandala 8 · Verse 22
abhi tvā vṛṣabhā sute sutaṁ sṛjāmi pītaye | tṛmpā vy aśnuhī madam
Mandala 8 · Verse 23
mā tvā mūrā aviṣyavo mopahasvāna ā dabhan | mākīm brahmadviṣo vanaḥ
Mandala 8 · Verse 24
iha tvā goparīṇasā mahe mandantu rādhase | saro gauro yathā piba
Mandala 8 · Verse 25
yā vṛtrahā parāvati sanā navā ca cucyuve | tā saṁsatsu pra vocata
Mandala 8 · Verse 26
apibat kadruvaḥ sutam indraḥ sahasrabāhve | atrādediṣṭa pauṁsyam
Mandala 8 · Verse 27
satyaṁ tat turvaśe yadau vidāno ahnavāyyam | vy ānaṭ turvaṇe śami
Mandala 8 · Verse 28
taraṇiṁ vo janānāṁ tradaṁ vājasya gomataḥ | samānam u pra śaṁsiṣam
Mandala 8 · Verse 29
ṛbhukṣaṇaṁ na vartava uktheṣu tugryāvṛdham | indraṁ some sacā sute
Mandala 8 · Verse 30
yaḥ kṛntad id vi yonyaṁ triśokāya girim pṛthum | gobhyo gātuṁ niretave
Mandala 8 · Verse 31
yad dadhiṣe manasyasi mandānaḥ pred iyakṣasi | mā tat kar indra mṛḻaya
Mandala 8 · Verse 32
dabhraṁ cid dhi tvāvataḥ kṛtaṁ śṛṇve adhi kṣami | jigātv indra te manaḥ
Mandala 8 · Verse 33
taved u tāḥ sukīrtayo 'sann uta praśastayaḥ | yad indra mṛḻayāsi naḥ
Mandala 8 · Verse 34
mā na ekasminn āgasi mā dvayor uta triṣu | vadhīr mā śūra bhūriṣu
Mandala 8 · Verse 35
bibhayā hi tvāvata ugrād abhiprabhaṅgiṇaḥ | dasmād aham ṛtīṣahaḥ
Mandala 8 · Verse 36
mā sakhyuḥ śūnam ā vide mā putrasya prabhūvaso | āvṛtvad bhūtu te manaḥ
Mandala 8 · Verse 37
ko nu maryā amithitaḥ sakhā sakhāyam abravīt | jahā ko asmad īṣate
Mandala 8 · Verse 38
evāre vṛṣabhā sute 'sinvan bhūry āvayaḥ | śvaghnīva nivatā caran
Mandala 8 · Verse 39
ā ta etā vacoyujā harī gṛbhṇe sumadrathā | yad īm brahmabhya id dadaḥ
Mandala 8 · Verse 40
bhindhi viśvā apa dviṣaḥ pari bādho jahī mṛdhaḥ | vasu spārhaṁ tad ā bhara
Mandala 8 · Verse 41
yad vīḻāv indra yat sthire yat parśāne parābhṛtam | vasu spārhaṁ tad ā bhara
Mandala 8 · Verse 42
yasya te viśvamānuṣo bhūrer dattasya vedati | vasu spārhaṁ tad ā bhara
Mandala 8 · Verse 1
tvāvataḥ purūvaso vayam indra praṇetaḥ | smasi sthātar harīṇām
Mandala 8 · Verse 2
tvāṁ hi satyam adrivo vidma dātāram iṣām | vidma dātāraṁ rayīṇām
Mandala 8 · Verse 3
ā yasya te mahimānaṁ śatamūte śatakrato | gīrbhir gṛṇanti kāravaḥ
Mandala 8 · Verse 4
sunītho ghā sa martyo yam maruto yam aryamā | mitraḥ pānty adruhaḥ
Mandala 8 · Verse 5
dadhāno gomad aśvavat suvīryam ādityajūta edhate | sadā rāyā puruspṛhā
Mandala 8 · Verse 6
tam indraṁ dānam īmahe śavasānam abhīrvam | īśānaṁ rāya īmahe
Mandala 8 · Verse 7
tasmin hi santy ūtayo viśvā abhīravaḥ sacā | tam ā vahantu saptayaḥ purūvasum madāya harayaḥ sutam
Mandala 8 · Verse 8
yas te mado vareṇyo ya indra vṛtrahantamaḥ | ya ādadiḥ sva1r nṛbhir yaḥ pṛtanāsu duṣṭaraḥ
Mandala 8 · Verse 9
yo duṣṭaro viśvavāra śravāyyo vājeṣv asti tarutā | sa naḥ śaviṣṭha savanā vaso gahi gamema gomati vraje
Mandala 8 · Verse 10
gavyo ṣu ṇo yathā purāśvayota rathayā | varivasya mahāmaha
Mandala 8 · Verse 11
nahi te śūra rādhaso 'ntaṁ vindāmi satrā | daśasyā no maghavan nū cid adrivo dhiyo vājebhir āvitha
Mandala 8 · Verse 12
ya ṛṣvaḥ śrāvayatsakhā viśvet sa veda janimā puruṣṭutaḥ | taṁ viśve mānuṣā yugendraṁ havante taviṣaṁ yatasrucaḥ
Mandala 8 · Verse 13
sa no vājeṣv avitā purūvasuḥ puraḥsthātā maghavā vṛtrahā bhuvat
Mandala 8 · Verse 14
abhi vo vīram andhaso madeṣu gāya girā mahā vicetasam | indraṁ nāma śrutyaṁ śākinaṁ vaco yathā
Mandala 8 · Verse 15
dadī rekṇas tanve dadir vasu dadir vājeṣu puruhūta vājinam | nūnam atha
Mandala 8 · Verse 16
viśveṣām irajyantaṁ vasūnāṁ sāsahvāṁsaṁ cid asya varpasaḥ | kṛpayato nūnam aty atha
Mandala 8 · Verse 17
mahaḥ su vo aram iṣe stavāmahe mīḻhuṣe araṁgamāya jagmaye | yajñebhir gīrbhir viśvamanuṣām marutām iyakṣasi gāye tvā namasā girā
Mandala 8 · Verse 18
ye pātayante ajmabhir girīṇāṁ snubhir eṣām | yajñam mahiṣvaṇīnāṁ sumnaṁ tuviṣvaṇīnām prādhvare
Mandala 8 · Verse 19
prabhaṅgaṁ durmatīnām indra śaviṣṭhā bhara | rayim asmabhyaṁ yujyaṁ codayanmate jyeṣṭhaṁ codayanmate
Mandala 8 · Verse 20
sanitaḥ susanitar ugra citra cetiṣṭha sūnṛta | prāsahā samrāṭ sahuriṁ sahantam bhujyuṁ vājeṣu pūrvyam
Mandala 8 · Verse 21
ā sa etu ya īvad ām̐ adevaḥ pūrtam ādade | yathā cid vaśo aśvyaḥ pṛthuśravasi kānīte3 'syā vyuṣy ādade
Mandala 8 · Verse 22
ṣaṣṭiṁ sahasrāśvyasyāyutāsanam uṣṭrānāṁ viṁśatiṁ śatā | daśa śyāvīnāṁ śatā daśa tryaruṣīṇāṁ daśa gavāṁ sahasrā
Mandala 8 · Verse 23
daśa śyāvā ṛdhadrayo vītavārāsa āśavaḥ | mathrā nemiṁ ni vāvṛtuḥ
Mandala 8 · Verse 24
dānāsaḥ pṛthuśravasaḥ kānītasya surādhasaḥ | rathaṁ hiraṇyayaṁ dadan maṁhiṣṭhaḥ sūrir abhūd varṣiṣṭham akṛta śravaḥ
Mandala 8 · Verse 25
ā no vāyo mahe tane yāhi makhāya pājase | vayaṁ hi te cakṛmā bhūri dāvane sadyaś cin mahi dāvane
Mandala 8 · Verse 26
yo aśvebhir vahate vasta usrās triḥ sapta saptatīnām | ebhiḥ somebhiḥ somasudbhiḥ somapā dānāya śukrapūtapāḥ
Mandala 8 · Verse 27
yo ma imaṁ cid u tmanāmandac citraṁ dāvane | araṭve akṣe nahuṣe sukṛtvani sukṛttarāya sukratuḥ
Mandala 8 · Verse 28
ucathye3 vapuṣi yaḥ svarāḻ uta vāyo ghṛtasnāḥ | aśveṣitaṁ rajeṣitaṁ śuneṣitam prājma tad idaṁ nu tat
Mandala 8 · Verse 29
adha priyam iṣirāya ṣaṣṭiṁ sahasrāsanam | aśvānām in na vṛṣṇām
Mandala 8 · Verse 30
gāvo na yūtham upa yanti vadhraya upa mā yanti vadhrayaḥ
Mandala 8 · Verse 31
adha yac cārathe gaṇe śatam uṣṭrām̐ acikradat | adha śvitneṣu viṁśatiṁ śatā
Mandala 8 · Verse 32
śataṁ dāse balbūthe vipras tarukṣa ā dade | te te vāyav ime janā madantīndragopā madanti devagopāḥ
Mandala 8 · Verse 33
adha syā yoṣaṇā mahī pratīcī vaśam aśvyam | adhirukmā vi nīyate
Mandala 8 · Verse 1
mahi vo mahatām avo varuṇa mitra dāśuṣe | yam ādityā abhi druho rakṣathā nem aghaṁ naśad anehaso va ūtayaḥ suūtayo va ūtayaḥ
Mandala 8 · Verse 2
vidā devā aghānām ādityāso apākṛtim | pakṣā vayo yathopari vy a1sme śarma yacchatānehaso va ūtayaḥ suūtayo va ūtayaḥ
Mandala 8 · Verse 3
vy a1sme adhi śarma tat pakṣā vayo na yantana | viśvāni viśvavedaso varūthyā manāmahe 'nehaso va ūtayaḥ suūtayo va ūtayaḥ
Mandala 8 · Verse 4
yasmā arāsata kṣayaṁ jīvātuṁ ca pracetasaḥ | manor viśvasya ghed ima ādityā rāya īśate 'nehaso va ūtayaḥ suūtayo va ūtayaḥ
Mandala 8 · Verse 5
pari ṇo vṛṇajann aghā durgāṇi rathyo yathā | syāmed indrasya śarmaṇy ādityānām utāvasy anehaso va ūtayaḥ suūtayo va ūtayaḥ
Mandala 8 · Verse 6
parihvṛted anā jano yuṣmādattasya vāyati | devā adabhram āśa vo yam ādityā ahetanānehaso va ūtayaḥ suūtayo va ūtayaḥ
Mandala 8 · Verse 7
na taṁ tigmaṁ cana tyajo na drāsad abhi taṁ guru | yasmā u śarma sapratha ādityāso arādhvam anehaso va ūtayaḥ suūtayo va ūtayaḥ
Mandala 8 · Verse 8
yuṣme devā api ṣmasi yudhyanta iva varmasu | yūyam maho na enaso yūyam arbhād uruṣyatānehaso va ūtayaḥ suūtayo va ūtayaḥ
Mandala 8 · Verse 9
aditir na uruṣyatv aditiḥ śarma yacchatu | mātā mitrasya revato 'ryamṇo varuṇasya cānehaso va ūtayaḥ suūtayo va ūtayaḥ
Mandala 8 · Verse 10
yad devāḥ śarma śaraṇaṁ yad bhadraṁ yad anāturam | tridhātu yad varūthya1ṁ tad asmāsu vi yantanānehaso va ūtayaḥ suūtayo va ūtayaḥ
Mandala 8 · Verse 11
ādityā ava hi khyatādhi kūlād iva spaśaḥ | sutīrtham arvato yathānu no neṣathā sugam anehaso va ūtayaḥ suūtayo va ūtayaḥ
Mandala 8 · Verse 12
neha bhadraṁ rakṣasvine nāvayai nopayā uta | gave ca bhadraṁ dhenave vīrāya ca śravasyate 'nehaso va ūtayaḥ suūtayo va ūtayaḥ
Mandala 8 · Verse 13
yad āvir yad apīcya1ṁ devāso asti duṣkṛtam | trite tad viśvam āptya āre asmad dadhātanānehaso va ūtayaḥ suūtayo va ūtayaḥ
Mandala 8 · Verse 14
yac ca goṣu duṣṣvapnyaṁ yac cāsme duhitar divaḥ | tritāya tad vibhāvary āptyāya parā vahānehaso va ūtayaḥ suūtayo va ūtayaḥ
Mandala 8 · Verse 15
niṣkaṁ vā ghā kṛṇavate srajaṁ vā duhitar divaḥ | trite duṣṣvapnyaṁ sarvam āptye pari dadmasy anehaso va ūtayaḥ suūtayo va ūtayaḥ
Mandala 8 · Verse 16
tadannāya tadapase tam bhāgam upaseduṣe | tritāya ca dvitāya coṣo duṣṣvapnyaṁ vahānehaso va ūtayaḥ suūtayo va ūtayaḥ
Mandala 8 · Verse 17
yathā kalāṁ yathā śaphaṁ yatha ṛṇaṁ saṁnayāmasi | evā duṣṣvapnyaṁ sarvam āptye saṁ nayāmasy anehaso va ūtayaḥ suūtayo va ūtayaḥ
Mandala 8 · Verse 18
ajaiṣmādyāsanāma cābhūmānāgaso vayam | uṣo yasmād duṣṣvapnyād abhaiṣmāpa tad ucchatv anehaso va ūtayaḥ suūtayo va ūtayaḥ
Mandala 8 · Verse 1
svādor abhakṣi vayasaḥ sumedhāḥ svādhyo varivovittarasya | viśve yaṁ devā uta martyāso madhu bruvanto abhi saṁcaranti
Mandala 8 · Verse 2
antaś ca prāgā aditir bhavāsy avayātā haraso daivyasya | indav indrasya sakhyaṁ juṣāṇaḥ śrauṣṭīva dhuram anu rāya ṛdhyāḥ
Mandala 8 · Verse 3
apāma somam amṛtā abhūmāganma jyotir avidāma devān | kiṁ nūnam asmān kṛṇavad arātiḥ kim u dhūrtir amṛta martyasya
Mandala 8 · Verse 4
śaṁ no bhava hṛda ā pīta indo piteva soma sūnave suśevaḥ | sakheva sakhya uruśaṁsa dhīraḥ pra ṇa āyur jīvase soma tārīḥ
Mandala 8 · Verse 5
ime mā pītā yaśasa uruṣyavo rathaṁ na gāvaḥ sam anāha parvasu | te mā rakṣantu visrasaś caritrād uta mā srāmād yavayantv indavaḥ
Mandala 8 · Verse 6
agniṁ na mā mathitaṁ saṁ didīpaḥ pra cakṣaya kṛṇuhi vasyaso naḥ | athā hi te mada ā soma manye revām̐ iva pra carā puṣṭim accha
Mandala 8 · Verse 7
iṣireṇa te manasā sutasya bhakṣīmahi pitryasyeva rāyaḥ | soma rājan pra ṇa āyūṁṣi tārīr ahānīva sūryo vāsarāṇi
Mandala 8 · Verse 8
soma rājan mṛḻayā naḥ svasti tava smasi vratyā3s tasya viddhi | alarti dakṣa uta manyur indo mā no aryo anukāmam parā dāḥ
Mandala 8 · Verse 9
tvaṁ hi nas tanvaḥ soma gopā gātre-gātre niṣasatthā nṛcakṣāḥ | yat te vayam pramināma vratāni sa no mṛḻa suṣakhā deva vasyaḥ
Mandala 8 · Verse 10
ṛdūdareṇa sakhyā saceya yo mā na riṣyed dharyaśva pītaḥ | ayaṁ yaḥ somo ny adhāyy asme tasmā indram pratiram emy āyuḥ
Mandala 8 · Verse 11
apa tyā asthur anirā amīvā nir atrasan tamiṣīcīr abhaiṣuḥ | ā somo asmām̐ aruhad vihāyā aganma yatra pratiranta āyuḥ
Mandala 8 · Verse 12
yo na induḥ pitaro hṛtsu pīto 'martyo martyām̐ āviveśa | tasmai somāya haviṣā vidhema mṛḻīke asya sumatau syāma
Mandala 8 · Verse 13
tvaṁ soma pitṛbhiḥ saṁvidāno 'nu dyāvāpṛthivī ā tatantha | tasmai ta indo haviṣā vidhema vayaṁ syāma patayo rayīṇām
Mandala 8 · Verse 14
trātāro devā adhi vocatā no mā no nidrā īśata mota jalpiḥ | vayaṁ somasya viśvaha priyāsaḥ suvīrāso vidatham ā vadema
Mandala 8 · Verse 15
tvaṁ naḥ soma viśvato vayodhās tvaṁ svarvid ā viśā nṛcakṣāḥ | tvaṁ na inda ūtibhiḥ sajoṣāḥ pāhi paścātād uta vā purastāt
Mandala 8 · Verse 1
abhi pra vaḥ surādhasam indram arca yathā vide | yo jaritṛbhyo maghavā purūvasuḥ sahasreṇeva śikṣati
Mandala 8 · Verse 2
śatānīkeva pra jigāti dhṛṣṇuyā hanti vṛtrāṇi dāśuṣe | girer iva pra rasā asya pinvire datrāṇi purubhojasaḥ
Mandala 8 · Verse 3
ā tvā sutāsa indavo madā ya indra girvaṇaḥ | āpo na vajrinn anv okya1ṁ saraḥ pṛṇanti śūra rādhase
Mandala 8 · Verse 4
anehasam prataraṇaṁ vivakṣaṇam madhvaḥ svādiṣṭham īm piba | ā yathā mandasānaḥ kirāsi naḥ pra kṣudreva tmanā dhṛṣat
Mandala 8 · Verse 5
ā naḥ stomam upa dravad dhiyāno aśvo na sotṛbhiḥ | yaṁ te svadhāvan svadayanti dhenava indra kaṇveṣu rātayaḥ
Mandala 8 · Verse 6
ugraṁ na vīraṁ namasopa sedima vibhūtim akṣitāvasum | udrīva vajrinn avato na siñcate kṣarantīndra dhītayaḥ
Mandala 8 · Verse 7
yad dha nūnaṁ yad vā yajñe yad vā pṛthivyām adhi | ato no yajñam āśubhir mahemata ugra ugrebhir ā gahi
Mandala 8 · Verse 8
ajirāso harayo ye ta āśavo vātā iva prasakṣiṇaḥ | yebhir apatyam manuṣaḥ parīyase yebhir viśvaṁ svar dṛśe
Mandala 8 · Verse 9
etāvatas ta īmaha indra sumnasya gomataḥ | yathā prāvo maghavan medhyātithiṁ yathā nīpātithiṁ dhane
Mandala 8 · Verse 10
yathā kaṇve maghavan trasadasyavi yathā pakthe daśavraje | yathā gośarye asanor ṛjiśvanīndra gomad dhiraṇyavat
Mandala 8 · Verse 1
pra su śrutaṁ surādhasam arcā śakram abhiṣṭaye | yaḥ sunvate stuvate kāmyaṁ vasu sahasreṇeva maṁhate
Mandala 8 · Verse 2
śatānīkā hetayo asya duṣṭarā indrasya samiṣo mahīḥ | girir na bhujmā maghavatsu pinvate yad īṁ sutā amandiṣuḥ
Mandala 8 · Verse 3
yad īṁ sutāsa indavo 'bhi priyam amandiṣuḥ | āpo na dhāyi savanam ma ā vaso dughā ivopa dāśuṣe
Mandala 8 · Verse 4
anehasaṁ vo havamānam ūtaye madhvaḥ kṣaranti dhītayaḥ | ā tvā vaso havamānāsa indava upa stotreṣu dadhire
Mandala 8 · Verse 5
ā naḥ some svadhvara iyāno atyo na tośate | yaṁ te svadāvan svadanti gūrtayaḥ paure chandayase havam
Mandala 8 · Verse 6
pra vīram ugraṁ viviciṁ dhanaspṛtaṁ vibhūtiṁ rādhaso mahaḥ | udrīva vajrinn avato vasutvanā sadā pīpetha dāśuṣe
Mandala 8 · Verse 7
yad dha nūnam parāvati yad vā pṛthivyāṁ divi | yujāna indra haribhir mahemata ṛṣva ṛṣvebhir ā gahi
Mandala 8 · Verse 8
rathirāso harayo ye te asridha ojo vātasya piprati | yebhir ni dasyum manuṣo nighoṣayo yebhiḥ svaḥ parīyase
Mandala 8 · Verse 9
etāvatas te vaso vidyāma śūra navyasaḥ | yathā prāva etaśaṁ kṛtvye dhane yathā vaśaṁ daśavraje
Mandala 8 · Verse 10
yathā kaṇve maghavan medhe adhvare dīrghanīthe damūnasi | yathā gośarye asiṣāso adrivo mayi gotraṁ hariśriyam
Mandala 8 · Verse 1
yathā manau sāṁvaraṇau somam indrāpibaḥ sutam | nīpātithau maghavan medhyātithau puṣṭigau śruṣṭigau sacā
Mandala 8 · Verse 2
pārṣadvāṇaḥ praskaṇvaṁ sam asādayac chayānaṁ jivrim uddhitam | sahasrāṇy asiṣāsad gavām ṛṣis tvoto dasyave vṛkaḥ
Mandala 8 · Verse 3
ya ukthebhir na vindhate cikid ya ṛṣicodanaḥ | indraṁ tam acchā vada navyasyā maty ariṣyantaṁ na bhojase
Mandala 8 · Verse 4
yasmā arkaṁ saptaśīrṣāṇam ānṛcus tridhātum uttame pade | sa tv i1mā viśvā bhuvanāni cikradad ād ij janiṣṭa pauṁsyam
Mandala 8 · Verse 5
yo no dātā vasūnām indraṁ taṁ hūmahe vayam | vidmā hy asya sumatiṁ navīyasīṁ gamema gomati vraje
Mandala 8 · Verse 6
yasmai tvaṁ vaso dānāya śikṣasi sa rāyas poṣam aśnute | taṁ tvā vayam maghavann indra girvaṇaḥ sutāvanto havāmahe
Mandala 8 · Verse 7
kadā cana starīr asi nendra saścasi dāśuṣe | upopen nu maghavan bhūya in nu te dānaṁ devasya pṛcyate
Mandala 8 · Verse 8
pra yo nanakṣe abhy ojasā kriviṁ vadhaiḥ śuṣṇaṁ nighoṣayan | yaded astambhīt prathayann amūṁ divam ād ij janiṣṭa pārthivaḥ
Mandala 8 · Verse 9
yasyāyaṁ viśva āryo dāsaḥ śevadhipā ariḥ | tiraś cid arye ruśame parīravi tubhyet so ajyate rayiḥ
Mandala 8 · Verse 10
turaṇyavo madhumantaṁ ghṛtaścutaṁ viprāso arkam ānṛcuḥ | asme rayiḥ paprathe vṛṣṇyaṁ śavo 'sme suvānāsa indavaḥ
Mandala 8 · Verse 1
yathā manau vivasvati somaṁ śakrāpibaḥ sutam | yathā trite chanda indra jujoṣasy āyau mādayase sacā
Mandala 8 · Verse 2
pṛṣadhre medhye mātariśvanīndra suvāne amandathāḥ | yathā somaṁ daśaśipre daśoṇye syūmaraśmāv ṛjūnasi
Mandala 8 · Verse 3
ya ukthā kevalā dadhe yaḥ somaṁ dhṛṣitāpibat | yasmai viṣṇus trīṇi padā vicakrama upa mitrasya dharmabhiḥ
Mandala 8 · Verse 4
yasya tvam indra stomeṣu cākano vāje vājiñ chatakrato | taṁ tvā vayaṁ sudughām iva goduho juhūmasi śravasyavaḥ
Mandala 8 · Verse 5
yo no dātā sa naḥ pitā mahām̐ ugra īśānakṛt | ayāmann ugro maghavā purūvasur gor aśvasya pra dātu naḥ
Mandala 8 · Verse 6
yasmai tvaṁ vaso dānāya maṁhase sa rāyas poṣam invati | vasūyavo vasupatiṁ śatakratuṁ stomair indraṁ havāmahe
Mandala 8 · Verse 7
kadā cana pra yucchasy ubhe ni pāsi janmanī | turīyāditya havanaṁ ta indriyam ā tasthāv amṛtaṁ divi
Mandala 8 · Verse 8
yasmai tvam maghavann indra girvaṇaḥ śikṣo śikṣasi dāśuṣe | asmākaṁ gira uta suṣṭutiṁ vaso kaṇvavac chṛṇudhī havam
Mandala 8 · Verse 9
astāvi manma pūrvyam brahmendrāya vocata | pūrvīr ṛtasya bṛhatīr anūṣata stotur medhā asṛkṣata
Mandala 8 · Verse 10
sam indro rāyo bṛhatīr adhūnuta saṁ kṣoṇī sam u sūryam | saṁ śukrāsaḥ śucayaḥ saṁ gavāśiraḥ somā indram amandiṣuḥ
Mandala 8 · Verse 1
upamaṁ tvā maghonāṁ jyeṣṭhaṁ ca vṛṣabhāṇām | pūrbhittamam maghavann indra govidam īśānaṁ rāya īmahe
Mandala 8 · Verse 2
ya āyuṁ kutsam atithigvam ardayo vāvṛdhāno dive-dive | taṁ tvā vayaṁ haryaśvaṁ śatakratuṁ vājayanto havāmahe
Mandala 8 · Verse 3
ā no viśveṣāṁ rasam madhvaḥ siñcantv adrayaḥ | ye parāvati sunvire janeṣv ā ye arvāvatīndavaḥ
Mandala 8 · Verse 4
viśvā dveṣāṁsi jahi cāva cā kṛdhi viśve sanvantv ā vasu | śīṣṭeṣu cit te madirāso aṁśavo yatrā somasya tṛmpasi
Mandala 8 · Verse 5
indra nedīya ed ihi mitamedhābhir ūtibhiḥ | ā śaṁtama śaṁtamābhir abhiṣṭibhir ā svāpe svāpibhiḥ
Mandala 8 · Verse 6
ājituraṁ satpatiṁ viśvacarṣaṇiṁ kṛdhi prajāsv ābhagam | pra sū tirā śacībhir ye ta ukthinaḥ kratum punata ānuṣak
Mandala 8 · Verse 7
yas te sādhiṣṭho 'vase te syāma bhareṣu te | vayaṁ hotrābhir uta devahūtibhiḥ sasavāṁso manāmahe
Mandala 8 · Verse 8
ahaṁ hi te harivo brahma vājayur ājiṁ yāmi sadotibhiḥ | tvām id eva tam ame sam aśvayur gavyur agre mathīnām
Mandala 8 · Verse 1
etat ta indra vīryaṁ gīrbhir gṛṇanti kāravaḥ | te stobhanta ūrjam āvan ghṛtaścutam paurāso nakṣan dhītibhiḥ
Mandala 8 · Verse 2
nakṣanta indram avase sukṛtyayā yeṣāṁ suteṣu mandase | yathā saṁvarte amado yathā kṛśa evāsme indra matsva
Mandala 8 · Verse 3
ā no viśve sajoṣaso devāso gantanopa naḥ | vasavo rudrā avase na ā gamañ chṛṇvantu maruto havam
🔊 Divine Listen
💬 WhatsApp
Mandala 8 · Verse 4
pūṣā viṣṇur havanam me sarasvaty avantu sapta sindhavaḥ | āpo vātaḥ parvatāso vanaspatiḥ śṛṇotu pṛthivī havam
Mandala 8 · Verse 5
yad indra rādho asti te māghonam maghavattama | tena no bodhi sadhamādyo vṛdhe bhago dānāya vṛtrahan
Mandala 8 · Verse 6
ājipate nṛpate tvam id dhi no vāja ā vakṣi sukrato | vītī hotrābhir uta devavītibhiḥ sasavāṁso vi śṛṇvire
Mandala 8 · Verse 7
santi hy a1rya āśiṣa indra āyur janānām | asmān nakṣasva maghavann upāvase dhukṣasva pipyuṣīm iṣam
Mandala 8 · Verse 8
vayaṁ ta indra stomebhir vidhema tvam asmākaṁ śatakrato | mahi sthūraṁ śaśayaṁ rādho ahrayam praskaṇvāya ni tośaya
Mandala 8 · Verse 1
bhūrīd indrasya vīrya1ṁ vy akhyam abhy āyati | rādhas te dasyave vṛka
Mandala 8 · Verse 2
śataṁ śvetāsa ukṣaṇo divi tāro na rocante | mahnā divaṁ na tastabhuḥ
Mandala 8 · Verse 3
śataṁ veṇūñ chataṁ śunaḥ śataṁ carmāṇi mlātāni | śatam me balbajastukā aruṣīṇāṁ catuḥśatam
Mandala 8 · Verse 4
sudevāḥ stha kāṇvāyanā vayo-vayo vicarantaḥ | aśvāso na caṅkramata
Mandala 8 · Verse 5
ād it sāptasya carkirann ānūnasya mahi śravaḥ | śyāvīr atidhvasan pathaś cakṣuṣā cana saṁnaśe
Mandala 8 · Verse 1
prati te dasyave vṛka rādho adarśy ahrayam | dyaur na prathinā śavaḥ
Mandala 8 · Verse 2
daśa mahyam pautakrataḥ sahasrā dasyave vṛkaḥ | nityād rāyo amaṁhata
Mandala 8 · Verse 3
śatam me gardabhānāṁ śatam ūrṇāvatīnām | śataṁ dāsām̐ ati srajaḥ
Mandala 8 · Verse 4
tatro api prāṇīyata pūtakratāyai vyaktā | aśvānām in na yūthyām
Mandala 8 · Verse 5
acety agniś cikitur havyavāṭ sa sumadrathaḥ | agniḥ śukreṇa śociṣā bṛhat sūro arocata divi sūryo arocata
Mandala 8 · Verse 1
yuvaṁ devā kratunā pūrvyeṇa yuktā rathena taviṣaṁ yajatrā | āgacchataṁ nāsatyā śacībhir idaṁ tṛtīyaṁ savanam pibāthaḥ
Mandala 8 · Verse 2
yuvāṁ devās traya ekādaśāsaḥ satyāḥ satyasya dadṛśe purastāt | asmākaṁ yajñaṁ savanaṁ juṣāṇā pātaṁ somam aśvinā dīdyagnī
Mandala 8 · Verse 3
panāyyaṁ tad aśvinā kṛtaṁ vāṁ vṛṣabho divo rajasaḥ pṛthivyāḥ | sahasraṁ śaṁsā uta ye gaviṣṭau sarvām̐ it tām̐ upa yātā pibadhyai
Mandala 8 · Verse 4
ayaṁ vām bhāgo nihito yajatremā giro nāsatyopa yātam | pibataṁ somam madhumantam asme pra dāśvāṁsam avataṁ śacībhiḥ
Mandala 8 · Verse 1
yam ṛtvijo bahudhā kalpayantaḥ sacetaso yajñam imaṁ vahanti | yo anūcāno brāhmaṇo yukta āsīt kā svit tatra yajamānasya saṁvit
Mandala 8 · Verse 2
eka evāgnir bahudhā samiddha ekaḥ sūryo viśvam anu prabhūtaḥ | ekaivoṣāḥ sarvam idaṁ vi bhāty ekaṁ vā idaṁ vi babhūva sarvam
Mandala 8 · Verse 3
jyotiṣmantaṁ ketumantaṁ tricakraṁ sukhaṁ rathaṁ suṣadam bhūrivāram | citrāmaghā yasya yoge 'dhijajñe taṁ vāṁ huve ati riktam pibadhyai
Mandala 8 · Verse 1
imāni vām bhāgadheyāni sisrata indrāvaruṇā pra mahe suteṣu vām | yajñe-yajñe ha savanā bhuraṇyatho yat sunvate yajamānāya śikṣathaḥ
Mandala 8 · Verse 2
niṣṣidhvarīr oṣadhīr āpa āstām indrāvaruṇā mahimānam āśata | yā sisratū rajasaḥ pāre adhvano yayoḥ śatrur nakir ādeva ohate
Mandala 8 · Verse 3
satyaṁ tad indrāvaruṇā kṛśasya vām madhva ūrmiṁ duhate sapta vāṇīḥ | tābhir dāśvāṁsam avataṁ śubhas patī yo vām adabdho abhi pāti cittibhiḥ
Mandala 8 · Verse 4
ghṛtapruṣaḥ saumyā jīradānavaḥ sapta svasāraḥ sadana ṛtasya | yā ha vām indrāvaruṇā ghṛtaścutas tābhir dhattaṁ yajamānāya śikṣatam
Mandala 8 · Verse 5
avocāma mahate saubhagāya satyaṁ tveṣābhyām mahimānam indriyam | asmān sv indrāvaruṇā ghṛtaścutas tribhiḥ sāptebhir avataṁ śubhas patī
Mandala 8 · Verse 6
indrāvaruṇā yad ṛṣibhyo manīṣāṁ vāco matiṁ śrutam adattam agre | yāni sthānāny asṛjanta dhīrā yajñaṁ tanvānās tapasābhy apaśyam
Mandala 8 · Verse 7
indrāvaruṇā saumanasam adṛptaṁ rāyas poṣaṁ yajamāneṣu dhattam | prajām puṣṭim bhūtim asmāsu dhattaṁ dīrghāyutvāya pra tirataṁ na āyuḥ
Mandala 8 · Verse 1
agna ā yāhy agnibhir hotāraṁ tvā vṛṇīmahe | ā tvām anaktu prayatā haviṣmatī yajiṣṭham barhir āsade
Mandala 8 · Verse 2
acchā hi tvā sahasaḥ sūno aṅgiraḥ srucaś caranty adhvare | ūrjo napātaṁ ghṛtakeśam īmahe 'gniṁ yajñeṣu pūrvyam
Mandala 8 · Verse 3
agne kavir vedhā asi hotā pāvaka yakṣyaḥ | mandro yajiṣṭho adhvareṣv īḍyo viprebhiḥ śukra manmabhiḥ
Mandala 8 · Verse 4
adrogham ā vahośato yaviṣṭhya devām̐ ajasra vītaye | abhi prayāṁsi sudhitā vaso gahi mandasva dhītibhir hitaḥ
Mandala 8 · Verse 5
tvam it saprathā asy agne trātar ṛtas kaviḥ | tvāṁ viprāsaḥ samidhāna dīdiva ā vivāsanti vedhasaḥ
Mandala 8 · Verse 6
śocā śociṣṭha dīdihi viśe mayo rāsva stotre mahām̐ asi | devānāṁ śarman mama santu sūrayaḥ śatrūṣāhaḥ svagnayaḥ
Mandala 8 · Verse 7
yathā cid vṛddham atasam agne saṁjūrvasi kṣami | evā daha mitramaho yo asmadhrug durmanmā kaś ca venati
Mandala 8 · Verse 8
mā no martāya ripave rakṣasvine māghaśaṁsāya rīradhaḥ | asredhadbhis taraṇibhir yaviṣṭhya śivebhiḥ pāhi pāyubhiḥ
Mandala 8 · Verse 9
pāhi no agna ekayā pāhy u1ta dvitīyayā | pāhi gīrbhis tisṛbhir ūrjām pate pāhi catasṛbhir vaso
Mandala 8 · Verse 10
pāhi viśvasmād rakṣaso arāvṇaḥ pra sma vājeṣu no 'va | tvām id dhi nediṣṭhaṁ devatātaya āpiṁ nakṣāmahe vṛdhe
Mandala 8 · Verse 11
ā no agne vayovṛdhaṁ rayim pāvaka śaṁsyam | rāsvā ca na upamāte puruspṛhaṁ sunītī svayaśastaram
Mandala 8 · Verse 12
yena vaṁsāma pṛtanāsu śardhatas taranto arya ādiśaḥ | sa tvaṁ no vardha prayasā śacīvaso jinvā dhiyo vasuvidaḥ
Mandala 8 · Verse 13
śiśāno vṛṣabho yathāgniḥ śṛṅge davidhvat | tigmā asya hanavo na pratidhṛṣe sujambhaḥ sahaso yahuḥ
Mandala 8 · Verse 14
nahi te agne vṛṣabha pratidhṛṣe jambhāso yad vitiṣṭhase | sa tvaṁ no hotaḥ suhutaṁ haviṣ kṛdhi vaṁsvā no vāryā puru
Mandala 8 · Verse 15
śeṣe vaneṣu mātroḥ saṁ tvā martāsa indhate | atandro havyā vahasi haviṣkṛta ād id deveṣu rājasi
Mandala 8 · Verse 16
sapta hotāras tam id īḻate tvāgne sutyajam ahrayam | bhinatsy adriṁ tapasā vi śociṣā prāgne tiṣṭha janām̐ ati
Mandala 8 · Verse 17
agnim-agniṁ vo adhriguṁ huvema vṛktabarhiṣaḥ | agniṁ hitaprayasaḥ śaśvatīṣv ā hotāraṁ carṣaṇīnām
Mandala 8 · Verse 18
ketena śarman sacate suṣāmaṇy agne tubhyaṁ cikitvanā | iṣaṇyayā naḥ pururūpam ā bhara vājaṁ nediṣṭham ūtaye
Mandala 8 · Verse 19
agne jaritar viśpatis tepāno deva rakṣasaḥ | aproṣivān gṛhapatir mahām̐ asi divas pāyur duroṇayuḥ
Mandala 8 · Verse 20
mā no rakṣa ā veśīd āghṛṇīvaso mā yātur yātumāvatām | parogavyūty anirām apa kṣudham agne sedha rakṣasvinaḥ
Mandala 8 · Verse 1
ubhayaṁ śṛṇavac ca na indro arvāg idaṁ vacaḥ | satrācyā maghavā somapītaye dhiyā śaviṣṭha ā gamat
Mandala 8 · Verse 2
taṁ hi svarājaṁ vṛṣabhaṁ tam ojase dhiṣaṇe niṣṭatakṣatuḥ | utopamānām prathamo ni ṣīdasi somakāmaṁ hi te manaḥ
Mandala 8 · Verse 3
ā vṛṣasva purūvaso sutasyendrāndhasaḥ | vidmā hi tvā harivaḥ pṛtsu sāsahim adhṛṣṭaṁ cid dadhṛṣvaṇim
Mandala 8 · Verse 4
aprāmisatya maghavan tathed asad indra kratvā yathā vaśaḥ | sanema vājaṁ tava śiprinn avasā makṣū cid yanto adrivaḥ
Mandala 8 · Verse 5
śagdhy ū3 ṣu śacīpata indra viśvābhir ūtibhiḥ | bhagaṁ na hi tvā yaśasaṁ vasuvidam anu śūra carāmasi
Mandala 8 · Verse 6
pauro aśvasya purukṛd gavām asy utso deva hiraṇyayaḥ | nakir hi dānam parimardhiṣat tve yad-yad yāmi tad ā bhara
Mandala 8 · Verse 7
tvaṁ hy ehi cerave vidā bhagaṁ vasuttaye | ud vāvṛṣasva maghavan gaviṣṭaya ud indrāśvamiṣṭaye
Mandala 8 · Verse 8
tvam purū sahasrāṇi śatāni ca yūthā dānāya maṁhase | ā puraṁdaraṁ cakṛma vipravacasa indraṁ gāyanto 'vase
Mandala 8 · Verse 9
avipro vā yad avidhad vipro vendra te vacaḥ | sa pra mamandat tvāyā śatakrato prācāmanyo ahaṁsana
Mandala 8 · Verse 10
ugrabāhur mrakṣakṛtvā puraṁdaro yadi me śṛṇavad dhavam | vasūyavo vasupatiṁ śatakratuṁ stomair indraṁ havāmahe
Mandala 8 · Verse 11
na pāpāso manāmahe nārāyāso na jaḻhavaḥ | yad in nv indraṁ vṛṣaṇaṁ sacā sute sakhāyaṁ kṛṇavāmahai
Mandala 8 · Verse 12
ugraṁ yuyujma pṛtanāsu sāsahim ṛṇakātim adābhyam | vedā bhṛmaṁ cit sanitā rathītamo vājinaṁ yam id ū naśat
Mandala 8 · Verse 13
yata indra bhayāmahe tato no abhayaṁ kṛdhi | maghavañ chagdhi tava tan na ūtibhir vi dviṣo vi mṛdho jahi
Mandala 8 · Verse 14
tvaṁ hi rādhaspate rādhaso mahaḥ kṣayasyāsi vidhataḥ | taṁ tvā vayam maghavann indra girvaṇaḥ sutāvanto havāmahe
Mandala 8 · Verse 15
indraḥ spaḻ uta vṛtrahā paraspā no vareṇyaḥ | sa no rakṣiṣac caramaṁ sa madhyamaṁ sa paścāt pātu naḥ puraḥ
Mandala 8 · Verse 16
tvaṁ naḥ paścād adharād uttarāt pura indra ni pāhi viśvataḥ | āre asmat kṛṇuhi daivyam bhayam āre hetīr adevīḥ
Mandala 8 · Verse 17
adyādyā śvaḥ-śva indra trāsva pare ca naḥ | viśvā ca no jaritṝn satpate ahā divā naktaṁ ca rakṣiṣaḥ
Mandala 8 · Verse 18
prabhaṅgī śūro maghavā tuvīmaghaḥ sammiślo viryāya kam | ubhā te bāhū vṛṣaṇā śatakrato ni yā vajram mimikṣatuḥ
Mandala 8 · Verse 1
pro asmā upastutim bharatā yaj jujoṣati | ukthair indrasya māhinaṁ vayo vardhanti somino bhadrā indrasya rātayaḥ
Mandala 8 · Verse 2
ayujo asamo nṛbhir ekaḥ kṛṣṭīr ayāsyaḥ | pūrvīr ati pra vāvṛdhe viśvā jātāny ojasā bhadrā indrasya rātayaḥ
Mandala 8 · Verse 3
ahitena cid arvatā jīradānuḥ siṣāsati | pravācyam indra tat tava vīryāṇi kariṣyato bhadrā indrasya rātayaḥ
Mandala 8 · Verse 4
ā yāhi kṛṇavāma ta indra brahmāṇi vardhanā | yebhiḥ śaviṣṭha cākano bhadram iha śravasyate bhadrā indrasya rātayaḥ
Mandala 8 · Verse 5
dhṛṣataś cid dhṛṣan manaḥ kṛṇoṣīndra yat tvam | tīvraiḥ somaiḥ saparyato namobhiḥ pratibhūṣato bhadrā indrasya rātayaḥ
Mandala 8 · Verse 6
ava caṣṭa ṛcīṣamo 'vatām̐ iva mānuṣaḥ | juṣṭvī dakṣasya sominaḥ sakhāyaṁ kṛṇute yujam bhadrā indrasya rātayaḥ
Mandala 8 · Verse 7
viśve ta indra vīryaṁ devā anu kratuṁ daduḥ | bhuvo viśvasya gopatiḥ puruṣṭuta bhadrā indrasya rātayaḥ
Mandala 8 · Verse 8
gṛṇe tad indra te śava upamaṁ devatātaye | yad dhaṁsi vṛtram ojasā śacīpate bhadrā indrasya rātayaḥ
Mandala 8 · Verse 9
samaneva vapuṣyataḥ kṛṇavan mānuṣā yugā | vide tad indraś cetanam adha śruto bhadrā indrasya rātayaḥ
Mandala 8 · Verse 10
uj jātam indra te śava ut tvām ut tava kratum | bhūrigo bhūri vāvṛdhur maghavan tava śarmaṇi bhadrā indrasya rātayaḥ
Mandala 8 · Verse 11
ahaṁ ca tvaṁ ca vṛtrahan saṁ yujyāva sanibhya ā | arātīvā cid adrivo 'nu nau śūra maṁsate bhadrā indrasya rātayaḥ
Mandala 8 · Verse 12
satyam id vā u taṁ vayam indraṁ stavāma nānṛtam | mahām̐ asunvato vadho bhūri jyotīṁṣi sunvato bhadrā indrasya rātayaḥ
Mandala 8 · Verse 1
sa pūrvyo mahānāṁ venaḥ kratubhir ānaje | yasya dvārā manuṣ pitā deveṣu dhiya ānaje
Mandala 8 · Verse 2
divo mānaṁ not sadan somapṛṣṭhāso adrayaḥ | ukthā brahma ca śaṁsyā
Mandala 8 · Verse 3
sa vidvām̐ aṅgirobhya indro gā avṛṇod apa | stuṣe tad asya pauṁsyam
Mandala 8 · Verse 4
sa pratnathā kavivṛdha indro vākasya vakṣaṇiḥ | śivo arkasya homany asmatrā gantv avase
Mandala 8 · Verse 5
ād ū nu te anu kratuṁ svāhā varasya yajyavaḥ | śvātram arkā anūṣatendra gotrasya dāvane
Mandala 8 · Verse 6
indre viśvāni vīryā kṛtāni kartvāni ca | yam arkā adhvaraṁ viduḥ
Mandala 8 · Verse 7
yat pāñcajanyayā viśendre ghoṣā asṛkṣata | astṛṇād barhaṇā vipo3 'ryo mānasya sa kṣayaḥ
Mandala 8 · Verse 8
iyam u te anuṣṭutiś cakṛṣe tāni pauṁsyā | prāvaś cakrasya vartanim
Mandala 8 · Verse 9
asya vṛṣṇo vyodana uru kramiṣṭa jīvase | yavaṁ na paśva ā dade
Mandala 8 · Verse 10
tad dadhānā avasyavo yuṣmābhir dakṣapitaraḥ | syāma marutvato vṛdhe
Mandala 8 · Verse 11
baḻ ṛtviyāya dhāmna ṛkvabhiḥ śūra nonumaḥ | jeṣāmendra tvayā yujā
Mandala 8 · Verse 12
asme rudrā mehanā parvatāso vṛtrahatye bharahūtau sajoṣāḥ | yaḥ śaṁsate stuvate dhāyi pajra indrajyeṣṭhā asmām̐ avantu devāḥ
Mandala 8 · Verse 1
ut tvā mandantu stomāḥ kṛṇuṣva rādho adrivaḥ | ava brahmadviṣo jahi
Mandala 8 · Verse 2
padā paṇīm̐r arādhaso ni bādhasva mahām̐ asi | nahi tvā kaś cana prati
Mandala 8 · Verse 3
tvam īśiṣe sutānām indra tvam asutānām | tvaṁ rājā janānām
Mandala 8 · Verse 4
ehi prehi kṣayo divy ā3ghoṣañ carṣaṇīnām | obhe pṛṇāsi rodasī
Mandala 8 · Verse 5
tyaṁ cit parvataṁ giriṁ śatavantaṁ sahasriṇam | vi stotṛbhyo rurojitha
Mandala 8 · Verse 6
vayam u tvā divā sute vayaṁ naktaṁ havāmahe | asmākaṁ kāmam ā pṛṇa
Mandala 8 · Verse 7
kva1 sya vṛṣabho yuvā tuvigrīvo anānataḥ | brahmā kas taṁ saparyati
Mandala 8 · Verse 8
kasya svit savanaṁ vṛṣā jujuṣvām̐ ava gacchati | indraṁ ka u svid ā cake
Mandala 8 · Verse 9
kaṁ te dānā asakṣata vṛtrahan kaṁ suvīryā | ukthe ka u svid antamaḥ
Mandala 8 · Verse 10
ayaṁ te mānuṣe jane somaḥ pūruṣu sūyate | tasyehi pra dravā piba
Mandala 8 · Verse 11
ayaṁ te śaryaṇāvati suṣomāyām adhi priyaḥ | ārjīkīye madintamaḥ
Mandala 8 · Verse 12
tam adya rādhase mahe cārum madāya ghṛṣvaye | ehīm indra dravā piba
Mandala 8 · Verse 1
yad indra prāg apāg udaṅ nyag vā hūyase nṛbhiḥ | ā yāhi tūyam āśubhiḥ
Mandala 8 · Verse 2
yad vā prasravaṇe divo mādayāse svarṇare | yad vā samudre andhasaḥ
Mandala 8 · Verse 3
ā tvā gīrbhir mahām uruṁ huve gām iva bhojase | indra somasya pītaye
Mandala 8 · Verse 4
ā ta indra mahimānaṁ harayo deva te mahaḥ | rathe vahantu bibhrataḥ
Mandala 8 · Verse 5
indra gṛṇīṣa u stuṣe mahām̐ ugra īśānakṛt | ehi naḥ sutam piba
Mandala 8 · Verse 6
sutāvantas tvā vayam prayasvanto havāmahe | idaṁ no barhir āsade
Mandala 8 · Verse 7
yac cid dhi śaśvatām asīndra sādhāraṇas tvam | taṁ tvā vayaṁ havāmahe
Mandala 8 · Verse 8
idaṁ te somyam madhv adhukṣann adribhir naraḥ | juṣāṇa indra tat piba
Mandala 8 · Verse 9
viśvām̐ aryo vipaścito 'ti khyas tūyam ā gahi | asme dhehi śravo bṛhat
Mandala 8 · Verse 10
dātā me pṛṣatīnāṁ rājā hiraṇyavīnām | mā devā maghavā riṣat
Mandala 8 · Verse 11
sahasre pṛṣatīnām adhi ścandram bṛhat pṛthu | śukraṁ hiraṇyam ā dade
Mandala 8 · Verse 12
napāto durgahasya me sahasreṇa surādhasaḥ | śravo deveṣv akrata
Mandala 8 · Verse 1
tarobhir vo vidadvasum indraṁ sabādha ūtaye | bṛhad gāyantaḥ sutasome adhvare huve bharaṁ na kāriṇam
Mandala 8 · Verse 2
na yaṁ dudhrā varante na sthirā muro made suśipram andhasaḥ | ya ādṛtyā śaśamānāya sunvate dātā jaritra ukthyam
Mandala 8 · Verse 3
yaḥ śakro mṛkṣo aśvyo yo vā kījo hiraṇyayaḥ | sa ūrvasya rejayaty apāvṛtim indro gavyasya vṛtrahā
Mandala 8 · Verse 4
nikhātaṁ cid yaḥ purusambhṛtaṁ vasūd id vapati dāśuṣe | vajrī suśipro haryaśva it karad indraḥ kratvā yathā vaśat
Mandala 8 · Verse 5
yad vāvantha puruṣṭuta purā cic chūra nṛṇām | vayaṁ tat ta indra sam bharāmasi yajñam ukthaṁ turaṁ vacaḥ
Mandala 8 · Verse 6
sacā someṣu puruhūta vajrivo madāya dyukṣa somapāḥ | tvam id dhi brahmakṛte kāmyaṁ vasu deṣṭhaḥ sunvate bhuvaḥ
--- Previous Pages - Next Page ---
